Янгиликлар
Ёшлар тадбиркорлиги эътиборда
Мамлакатимизда мустақилликнинг дастлабки кунларидан бошлаб тадбиркорликни ривожлантириш, тадбиркорлик субъектлари ва хорижий инвесторлар фаолиятининг эркинлигини таъминлашга қаратилган зарур норматив-ҳуқуқий база яратилиб, замон талабларидан келиб чиққан ҳолда мунтазам равишда такомиллаштирилиб борилмоқда.
Айниқса, мамлакатни ижтимоий-иқтисодий ривожлантириш ва бозор ислоҳотларини чуқурлаштиришга қаратилган Давлат дастурлари ҳамда бу борадаги муҳим ва устувор йўналишларни белгилаган ҳужжатлар юртимизда кичик бизнес ва хусусий тадбиркорлик соҳасининг янада ривож топишига замин яратаётган бўлиб, оилавий тадбиркорлик ҳамда ёш тадбиркорлар сафини янада кенгайишига йўл очиб бермоқда.
Алоҳида таъкидлаш жоизки, муҳтарам Юртбошимиз томонидан Ўзбекистон Республикаси Олий Мажлиси Қонунчилик палатаси ва Сенатининг 2010 йил 12 ноябрдаги қўшма мажлисида илгари сурилган Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепциясида олтинчи устувор йўналиш сифатида демократик бозор ислоҳотларини ва иқтисодиётни либераллаштиришни янада чуқурлаштиришга қаратилган ташкилий-ҳуқуқий масалаларга алоҳида эътибор берилиб, бу соҳадаги мавжуд норматив-ҳуқуқий базани янада такомиллаштириш ҳамда бир қатор янги қонун ҳужжатларини қабул қилиб, ижтимоий ҳаётга татбиқ қилиш масалалари кун тартибига киритилган эди.
Юқоридаги вазифалардан келиб чиққан ҳолда давлатимизда амалга оширилаётган иқтисодий ислоҳотлар асосида Наманган вилоятида ҳам бу йўналишда муайян ишлар олиб борилмоқда. Хусусан, вилоятда кичик бизнес ва хусусий тадбиркорликни ривожлантириш, ёш тадбиркорлар сафини кенгайтириш ва уларни қўллаб-қувватлаш борасида вилоят ҳокимлиги томонидан мутасадди идора ва ташкилотлар билан ҳамкорликда зарурий чора-тадбирлар белгиланиб, ижрога қаратиб келинмоқда.
Шу ўринда қайд этиш лозимки, тадбиркорлик фаолияти билан шуғулланиш истагида бўлган вилоятдаги касб-ҳунар коллежларининг битирувчиларини бу соҳага жалб қилиш, тадбиркорлик йўналишида зарур кўникмаларини шакллантириш, ўз бизнесларини ташкил этиш ва самарали юритишларига кўмаклашиш масалаларига алоҳида эътибор қаратилаётган бўлиб, бу борада маҳаллий ҳокимлик ва манфаатдор идоралар ҳамкорлиги йўлга қўйилган.
Масалан, биргина жорий йилнинг 26-28 июнь кунлари давомида тегишли идоралар ҳамкорлигида тадбиркорлик фаолияти билан шуғулланиш истагида бўлган касб-ҳунар коллежларининг мингга яқин битирувчилари иштирокида вилоятнинг ҳар бир тумани (шаҳри)да ўқув семинарлари ташкил этилиб, ёшларга тадбиркорлик фаолиятини йўлга қўйиш, бу борадаги фаолиятнинг ташкилий-ҳуқуқий асослари, яратилган имконият ва имтиёзлар юзасидан зарур ҳуқуқий тушунтиришлар берилди. Хусусан, тадбиркорлик фаолияти тушунчаси ва унинг ҳуқуқий асослари, тадбиркорлик субъектларини давлат рўйхатидан ўтказиш тартиблари, бизнесни режалаштириш ва бизнес режа тузиш, кичик бизнес ва хусусий тадбиркорлик субъектлари томонидан тўланадиган солиқлар ва уларга белгиланган имтиёзлар, кредит турлари ва фоизлари, гаров таъминотининг турлари ҳамда гаров ҳужжатларини расмийлаштириш тартиби масалалари юзасидан адлия ва давлат солиқ бошқармалари, марказий банкнинг вилоят бошқармаси, савдо-саноат палатаси вилоят ҳудудий бошқармаси ҳамда тадбиркорлик субъектларини давлат рўйхатидан ўтказиш инспекцияларининг малакали мутахассислари томонидан яқиндан керакли тушунтиришлар берилиб, ёшларга тадбиркорлик фаолиятини йўлга қўйишдаги бир қатор муҳим масалалар юзасидан тегишли тавсиялар берилди.