Янгиликлар

Davlat xizmatlari markazi yetti yoshda.

Bundan yetti yil ilgari aynan shu xizmatlardan foydalanish uchun odamlar shuncha idoraga borgan. Bir necha xizmatga ehtiyoji bor kishi ishlarini bir kunda bitirishi mutlaqo imkonsiz edi. Bir idoraga borib ishini bitirib chiqib ketishning oʻzi dargumon edi, hatto. Xizmatlar yaxshi yoʻlga qoʻyilmaganidan turnaqator navbatlar, turli byurokratik toʻsiqlardan osonlikcha oʻtib boʻlmasdi.

Zamonaviy binodagi shart-sharoitlar har qanday kishining dilini yorishtirib yuboradi. Xodimlarning xushmuomala, elektron navbat tizimi borligi, kutish zalidagi qulay sharoitlar. Hammasi inson va fuqarolarga oson va qulaylik yaratish uchun tashkil etilgan.

Bu davlatimiz rahbarining “Xalq davlat idoralariga emas, davlat idoralari xalqimizga xizmat qilishi kerak” degan ulugʻvor gʻoyasi amalda taʼminlanayotgani natijasidir!

Oʻzbekiston Respublikasi Adliya vazirligi huzuridagi Davlat xizmatlari markazi bundan yetti yil yil oldin tashkil etilgan. Oʻtgan qisqa vaqt mobaynida bu tizim xalqimiz uchun eng kerakli, muhimi, eng qulay makonga aylandi.

Davlat xizmatlari koʻrsatishda ilk bora xizmat koʻrsatishning eksterritorial tamoyili joriy etildi. Buning maʼnosi shuki, mamlakatning qayerida boʻlishingizdan qatʼi nazar, davlat xizmati markaziga kirib xizmatlardan foydalanish mumkin.

Tadbirkorlik subʼektlarini roʻyxatdan oʻtkazish bilan bir vaqtda onlayn bank hisob raqamlarini ochish mexanizmi yoʻlga qoʻyildi. Bunda muhr va shtamplardan foydalanish majburiyati bekor qilindi.

Davlat xizmatlarini olishda navbatni boshqarish, xodimlar faoliyatini baholab borish hamda xizmat koʻrsatish samarasini avtomatik tarzda tahlil qilib boruvchi “aqlli” tizim joriy etildi.

Fuqarolar tomonidan farzand tugʻilganligini qayd qilish bilan bir vaqtda 6 turdagi (shifoxonadan tugʻilganlik haqidagi tibbiy maʼlumotnoma olish, FHDY organida tugʻilganlikni qayd etish, poliklinikaga hisobga qoʻyish, bir martalik nafaqa pulini olish, yashash joyi boʻyicha roʻyxatga qoʻyish, bolani davlat maktabgacha taʼlim tashkilotiga navbatga qoʻyish) xizmatlardan foydalanish imkonini beruvchi kompozit davlat xizmatlari koʻrsatilishi joriy qilindi.

Davlat xizmatlarini onlayn olishda yanada qulayliklar yaratish maqsadida Elektron raqamli imzo sertifikatini onlayn olish imkoniyati yaratildi.

Davlat xizmatlari koʻrsatilishida shaffoflikni taʼminlash maqsadida toʻlovlar haqida sms-xabar yuborilishi joriy qilindi. Bunda davlat xizmatlari koʻrsatishning har bir bosqichida toʻlangan pul mablagʻlari haqida murojaat mualliflarining telefon raqamlariga sms-xabar yuborilmoqda.

Xulosa qilib aytganda davlat xizmatlarini koʻrsatish borasidagi barcha shart sharoitlar faqatgina inson va fuqarolarga qulaylik yaratish, ularni ogʻirini engil uzogʻini yaqin qilish maqsadida amalga oshirib kelinmoqda.

Olimjon Qobilov,
Yangi Namangan tumani davlat 
xizmatlari markazi boʻlim boshligʻi