Янгиликлар

Эскирган ва ўз аҳамиятини йўқотган қарорларга гильотина қўллаш орқали ҳуқуқий база соддалаштирилди

  Мамлакатимизда давлат ва жамият қурилишининг асосларини мустаҳкамлашга, бозор иқтисодиётини ривожлантиришга, суд-ҳуқуқ тизимини янада демократлаштиришга, шунингдек, аҳолининг ижтимоий ҳимоясини кучайтириш ва фуқароларнинг фаровонлигини яхшилашга қаратилган изчил чора-тадбирлар амалга оширилмоқда.
    Шу билан бирга, қонунчиликдаги тизимли ўзгаришлар билан боғлиқ жадал ривожланиш норматив-ҳуқуқий ҳужжатлар сони ортишига олиб келди. Қонунчилик ҳужжатларининг тарқоқлиги амалиётда уларни тушунишни қийинлаштиришга, ҳуқуқий тафовут ва коллизияларга, ҳаддан ташқари тартибга солиш ва бюрократияга сабаб бўлмоқда.
    Мамлакатда сўнгги уч йилда амалга оширилган ислоҳотлар институционал-ҳуқуқий базани янгилашни, амалга оширилаётган чуқур ўзгаришларни инобатга олган ҳолда эскирган ва ўз аҳамиятини йўқотган нормаларни бекор қилишни тақозо этмоқда.
    Жорий йилнинг 27 сентябрида Ўзбекистон Республикаси Президентининг “Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида” 6075-сонли фармони қабул қилинди.
   Мазкур фармонни ижросини таъминлаш мақсадида Наманган вилоят адлия бошқармаси томонидан маҳаллий давлат ҳокимияти органларининг давлат ҳисобига олинган барча норматив тусдаги қарорлари эскирган ва ўз аҳамиятини йўқотган ҳужжатларни аниқлаш юзасидан хатлов ўтказилди. Хатлов натижасида 651 та маҳаллий давлат ҳокимияти органларининг эскирган ва ўз аҳамиятини йўқотган норматив тусдаги қарорлари аниқланди, шунингдек ушбу аниқланган эскирган ва ўз аҳамиятини йўқотган ҳужжатларни бекор қилиш юзасидан халқ депутатлари Наманган вилояти Кенгашига қарор лойиҳаси тайёрланиб киртилди.
    Эскирган ва ўз аҳамиятини йўқотган ҳужжатларни бекор қилиш юзасидан киритилган қарор лойиҳасига кўра Халқ депутатлари Наманган вилоят Кенгашининг 2021 йил 17 майда “Наманган вилояти маҳаллий давлат ҳокимияти органларининг эскирган ва ўз аҳамиятини йўқотган норматив тусдаги қарорларини бекор қилиш тўғрисида”ги 1-6-0-K/21-сонли қарори қабул қилиниб, 651 та норматив тусдаги қарорлари бекор қилинди.
    Юқоридагилардан кўзланган мақсад ортиқча бюрократик тартиб-таомилларни бартараф этиш, энг аввало тадбиркорлик фаолиятига нисбатан тартибга солиш юкини камайтириш, норматив-ҳуқуқий базанинг тизимлилигини ва комплекслилигини таъминлаш ҳисобланади.

Наманган вилоят адлия
бошқармасининг биринчи ўринбосари
Исматиллаев Улуғбек Тоҳиржанович