Янгиликлар
Вақтинчалик чеклов тартибига амал қилайлик!
Бугун барчамиз енгил ҳавода оғир дард, ҳар ютум нафасда ҳавотир борлигини, кимсасиз кўчалар, бўм-бўш боғлар, болалар яйраб ўйнаши керак бўлган чоғларда ҳадикли дунё кўндаланг турганлигини яхши англамоқдамиз.
Бу ҳам аслида яратганнинг имтихони, шу синовлардан қандай ўтиб олиш ўзимизга қолди. Мана яқин бир ойдирки, юртимизда яшин тезлик билан олиб борилаётган чора-тадбирлардан хабардормиз ва давлат хизматчиси сифатида иштирок этяпмиз.
Карантин қоидалари ва унинг тартиб-таомиллари, санитария ва эпидемияга қарши кураш қоидаларини бузганлик учун қонунчилигимизда кескин жавобгарликлар кучайтирилди. Ва бу ҳақда юртдошларимизни доимий равишда ҳабардор қилиб бормоқдамиз.
Бугун ҳар қачонгиданда муҳим бўлган масалага эътиборингизни қаратмоқчимиз. Аҳоли соғлигини сақлаш мақсадида қатор чеклов чоралари жорий этилаётган бир вақда Республика махсус комиссиясининг қарорига кўра, 2020 йил 30 мартдан 20 апрелга қадар вилоятлараро, Тошкент ва Нукус шаҳарлари ҳамда вилоятлар марказларида автотранспорт воситалари Давлат хизматлари марказлари томонидан бериладиган махсус рухсатнома (стикер)лар асосида ҳаракатланиши мумкинлиги белгиланди.
Хўш бу нима учун керак? Биринчи навбатда халқимизни яна бир бора уйда қолишга чақириш бўлса, иккинчи навбатда ҳудудларда фуқаролар ҳаракатини чеклаш ва бу орқали карантин шаротини сақлашдан иборат. Бир ўйлаб кўрайлик, ҳозирги шароитда автомобили йўқ оилани учратиш мушкул, керак бўлса, кўп фарзандли оилаларда икки ва ундан ортиқ автомашиналар бор. Шу билан бир қаторда йўловчи ташувчилар, аҳоли гавжум жойлардаги тирбандликлар, буларнинг барчаси одамларни тўпланишига, кўча-куйда ҳаракатланишига олиб келмайдими?
Шу муносабат билан, Махсус комиссия қарорига кўра давлат хизматлари марказлари томонидан бериладиган рухсатнома ариза берувчининг тегишли автотранспорт воситаларига вилоятлараро, Тошкент ва Нукус шаҳарлари ҳамда вилоятлар марказларида ҳаракатланиш ҳуқуқини беради.
Ҳудудларда фуқароларнинг тўпланишини олдини олиш мақсадида ҳаракатланиш ҳуқуқини берувчи махсус рухсатнома (стикер) олиш учун аризаларни масофадан туриб, онлайн топшириш тизими жорий этилди. Бундан кўзланган бирдан бир мақсад, фуқароларимизнинг муҳим заруратсиз кўчага чиқмаслигини, уларнинг уйда қолишини таъминлашдир.
Ариза берувчи рухсатнома олиш учун Ягона интерактив давлат хизматлари портали (ЯИДХП)да рўйхатдан ўтади ва мустақил равишда сўровномани электрон шаклда тўлдиради.
Сўровномага рухсатнома олиш учун асос бўлган ҳужжат нусхаси (лицензияланадиган фаолият тури бўйича лицензия, рухсат этиш хусусиятига эга ҳужжат, ходимнинг меҳнат дафтарчаси ва лавозимга тайинланганлиги тўғрисида буйруқ, автотранспорт воситаси ижара ёки ишончнома асосида фойдаланилганда ижара шартномаси ёки ишончнома) илова қилинади.
ДХМ ариза расмийлаштирилгандан сўнг 8 иш соати ичида QR-код қўйилган рухсатномани ёки рухсатнома беришни рад этиш хабарномасини шакллантириб, ариза берувчини ахборот-коммуникация технологиялари орқали хабардор қилади.
Ариза берувчи хабарнома олгандан кейин 1 иш куни ичида ДХМга рухсатномани олиш учун ўзи келиб мурожаат этади.
Бунда, ДХМ томонидан юборилган хабарнома ариза берувчининг автотранспорт воситасида ДХМгача ҳаракатланишига асос ҳисобланади.
ДХМга келган ариза берувчига муҳр босилган рухсатнома ва стикер рухсатномалар реестрида имзо қўйдирган ҳолда тақдим этилади.
Шундай бўлишига қарамасдан, жорий йилнинг 31 март куни биргина Тошкент шаҳри ДХМларида 4500 дан ортиқ, вилоятларда эса 3200 га яқин фуқаролар ташрифи кузатилди.
Буни қарангки, ушбу рухсатномани Андижон вилоятида айрим шахслар қалбакилаштиришга ҳам улгурди. Бундай қилмишлар учун, яъни автомашинада ҳаракатланиш ҳуқуқини берувчи махсус рухсатномани қалбакилаштириш, уни сотиш, қалбаки эканлигини била туриб ундан фойдаланиш Ўзбекистон Республикаси Жиноят кодексининг 228-моддасига асосан жиноий жавобгарликка тортиш учун асос бўлади.
Хурматли ҳамшаҳарлар, биз сиз учун ишлаяпмиз, Сиз биз учун уйда қолинг, мутахассисларнинг тавсияларига амал қилинг, Сизу бизнинг хавфсизлигимиз учун карантин вақтида ўрнатилган тартибларни, вақтинчалик чекловларни тўғри қабул қилинг, илтимос. Бу билан Сиз жонажон Ўзбекистонимизда ушбу Пандемиянинг тарқалишини олдини олишга улкан хисса қўшасиз, УЙДА ҚОЛИНГ!!!
Хайрулло Сабиров
Наманган вилоят адлия бошқармаси бошлиғи.