Янгиликлар

Сарсонгарчиликнинг олди олинди

   Наманган шаҳар адлия бўлими томонидан фуқаро М.Солибаевнинг Наманган шаҳар 1-оилавий поликлиникадан II гуруҳ ногирони бўлганлиги сабабли “Олтиариқ” соғломлаштириш санаториясига 9 октябрдан 20 октябргача даволаниш учун бепул йўлланма олганлиги, лекин соғлиғи ёмонлашгани сабабли йўлланмадан фойдаланмаганлиги учун санатория йўлланмасини қайта тиклаб бериш юзасидан қилган мурожаати рад этилганлигидан норози бўлиб қилган мурожаати ўрганиб чиқилди.

  Ўрганиш жараёнида аниқланишича, “Ногиронлар ва кексаларни бепул санатория-курорт йўлланмалари билан таъминлаш тартиби тўғрисида”ги Йўриқноманинг (рўйхат рақами 2356, 2012 йил 27 апрель) 18-бандида ногиронлар ва кексалар санаторийга бора олмаган тақдирда зудлик билан марказга ахборот бериши лозимлиги ҳамда келиш муддатларини кўчириш тўғрисида мурожаат қилиши мумкинлиги белгиланган.

  Натижада, Наманган шаҳар адлия бўлимининг амалий ёрдами билан фуқаро М.Солибаевга Наманган шаҳар тиббиёт бирлашмасининг ижтимоий ҳимоя бўлими томонидан бепул даволаниш учун февраль ойида “Косонсой” сихатгоҳига йўлланма берилиши таъминланди.

Наманган шаҳар адлия бўлими
етакчи маслаҳатчиси
Отабек Каримжонов