Янгиликлар

Юридик хизмат фаолиятини янада такомиллаштириш

Ўзбекистон Республикаси Адлия вазирлиги томонидан марказ ваминтақаларда “Давлат органларида юридик хизмат фаолиятини янада такомиллаштириш ва ривожлантиришнинг долзарб масалалари - мавжуд муаммолар ва уларни ҳал этиш йўллари” мавзуида туркум анжуманлар ташкил этилмоқда. Уларнинг навбатдагиси Наманган вилоят адлия бошқармасида бўлиб ўтди.

Анжуманда қайд этилганидек, мамлакатимизда давлат бошқаруви ва маҳаллий давлат ҳокимияти органлари фаолиятида қонунийликни таъминлаш, юридик хизматнинг бошқарувдаги ролини янада ошириш ва уни ривожлантириш борасида муайян ишлар амалга оширилмоқда.

Иштирокчиларга соҳа фаолиятини тартибга солишга оид қатор норматив-ҳуқуқий ҳужжатлар мазмун-моҳияти, уларнинг ижросини таъминлаш юзасидан қилинган ишлар хусусида атрофлича маълумот берилди.

Хабарингиз бор, Давлат бошқаруви органлари ҳудудий бўлинмалари ва маҳаллий давлат ҳокимияти органларида юридик хизмат аҳволи Олий Мажлис Сенати мажлисида ҳамда Ҳукуматимиз томонидан ўтказилган йиғилишда муҳокама қилинган эди. Қабул қилинган қарорга мувофиқ ҳамкорликда бир қатор ишлар амалга оширилди. Хусусан, ҳар бир давлат органи юридик хизматининг функционал вазифалари янгидан ишлаб чиқилиб, адлия органлари билан келишилди; юридик хизматга қулай шарт-шароит яратиш мақсадида минимал талаблар ишлаб чиқилиб, ижрога юборилди; малака оширмасдан келаётган юридик хизмат ходимларини ўқитиш бўйича тақсимот режа ишлаб чиқилиб, унинг ижроси юзасидан қарийб 700 нафар ходимларнинг ўқитилиши таъминланди; 515 нафар юридик хизмат ходимларини аттестациядан ўтказиш таъминланди.

Энг асосийси, юридик хизматнинг ҳуқуқий мақомини белгилаб берувчи қонун ҳужжатлари замон талаблари асосида қайта кўриб чиқилди. Жумладан, давлат органлари юридик хизматлари фаолиятини, шунингдек уларнинг ходимларини аттестациядан ўтказиш тартибини янада такомиллаштириш мақсадида, 2015 йил 4 июнда Вазирлар Маҳкамасининг “Давлат ва хўжалик бошқаруви органлари, маҳаллий давлат ҳокимияти органлари юридик хизматлари фаолиятининг янада такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида”ги қарори қабул қилинди. Ушбу ҳужжат билан Ҳукуматнинг 2007 йил 24 августдаги “Давлат ва хўжалик бошқаруви органлари, маҳаллий давлат ҳокимияти органлари, давлат корхоналари, муассасалари ва ташкилотлари фаолиятини ҳуқуқий таъминлаш даражасини янада ошириш чора-тадбирлари тўғрисида”ги қарорига ҳамда Вазирлар Маҳкамасининг 2007 йил 22 ноябрдаги қарори билан тасдиқланган Юридик хизматлар ходимларини аттестациядан ўтказиш ва уларнинг малакасини ошириш тартиби тўғрисидаги низомга қўшимча ва ўзгартиришлар киритилди.

“Норматив-ҳуқуқий ҳужжатлар тўғрисида”ги Ўзбекистон Республикаси Қонунининг 22-моддасида маҳаллий давлат ҳокимияти органларининг норматив-ҳуқуқий хусусиятга эга бўлган қарорлари лойиҳаларининг ҳуқуқий экспертизаси Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари томонидан амалга оширилиши белгиланган.

Шу ўринда семинар қатнашчилари эътиборига бир неча далил ва рақамлар ҳавола этилди. Хусусан, 2012-2013 йиллар давомида ҳудудий адлия органлари томонидан жами 2224 та қарор лойиҳаси ҳуқуқий экспертизадан ўтказилган бўлса, 2014-2015 йилларда бу кўрсаткич 3785 тани ташкил этди. Шундан 2012-2013 йилларда халқ депутатлари вилоят, туман ва шаҳар Кенгашларининг 269 та қарор лойиҳалари ҳудудий адлия органлари томонидан ҳуқуқий экспертизадан ўтказилган бўлса, бу кўрсаткич 2014-2015 йилларда эса 611 тани ташкил этди.

Мазкур услубиёт маҳаллий давлат ҳокимияти органларининг қарорлари лойиҳаларининг, шунингдек вазирликлар, давлат қўмиталари ва идораларнинг норматив-ҳуқуқий ҳужжатларининг коррупцияга қарши экспертизасини ўтказишнинг тартибини белгилаб беради.

Тадбирда ушбу ҳужжатнинг мазмун-моҳияти хақида батафсил тушунтириш берилди. Учрашувда билдирилган мулоҳазалардан шундай хулоса қилиш мумкинки, ижтимоий-иқтисодий ислоҳотларни амалга ошириш учун йўл очиб берадиган норматив-ҳуқуқий ҳужжатларни қабул қилиш қонун ижодкорлиги ва ҳуқуқни қўллаш соҳасида ягона давлат сиёсатини изчил амалга оширишда муҳим омил бўлиб хизмат қилади.