Oʻzbekiston Respublikasi Adliya vazirligining korrupsiyaga qarshi kurashish SIYOSATI
Oʻzbekiston Respublikasi adliya vazirining
2020-yil “24”fevraldagi
42-um-son buyrugʻiga
1-ilova
Oʻzbekiston Respublikasi Adliya vazirligining
korrupsiyaga qarshi kurashish
SIYOSATI
1-bob. Umumiy qoidalar
1. Oʻzbekiston Respublikasi Adliya vazirligining korrupsiyaga qarshi kurashish siyosati (bundan buyon matnda Siyosat deb yuritiladi) xodimlar orasida hamda jamiyatda korrupsiyaga qarshi kurashish madaniyati darajasini oshirish maqsadida adliya organlarining yuqori axloqiy meʼyorlarga sodiqligini, shuningdek, adliya organlarining xodimlari faoliyatida korrupsiyaviy huquqbuzarliklarga murosasizlik va ularni sodir etishga yoʻl qoʻymaslikni aks ettiradi.
2. Siyosat ISO 37001:2016 “Korrupsiyaga qarshi kurashish menejmenti tizimlari – Foydalanish boʻyicha talablar va tavsiyalar” xalqaro standarti talablarini inobatga olgan holda korrupsiyaga qarshi kurashish boʻyicha xalqaro tashkilotlar tavsiyalari va yetakchi xalqaro amaliyot asosida Oʻzbekiston Respublikasining qonun hujjatlari talablariga muvofiq ishlab chiqilgan.
3. Oʻzbekiston Respublikasi Adliya vazirligining (keyingi oʻrinlarda – Vazirlik deb yuritiladi) hududiy va tarkibiy tuzilmalari ushbu siyosatni faoliyatining ahamiyatini hisobga olgan holda qabul qilishlari, korrupsiyaga qarshi kurashish mexanizmlarini, mavjud boʻlgan korrupsiya xavfi, tajribasi va mavjud manbalari asosida ishlab chiqishlari va amalga oshirishlari lozim.
4. Vazirlikning markaziy apparati, hududiy va tarkibiy tuzilmalari (keyingi oʻrinlarda – adliya organlari va muassasalari) korrupsiyaga qarshi kurashishning asosiy maqsadlari quyidagilar hisoblanadi:
adliya organlari va muassasalarida korrupsiyani tubdan yoʻqotishga erishish;
aholining huquqiy ongi va huquqiy madaniyatini oshirish, jamiyatda korrupsiyaga nisbatan toqatsiz munosabatni shakllantirish;
adliya organlari va muassasalari faoliyatining barcha sohalarida korrupsiyani oldini olish boʻyicha chora-tadbirlarni amalga oshirish;
korrupsiyaviy huquqbuzarliklarni oʻz vaqtida aniqlash, ularga barham berish, ularning oqibatlari, ularga olib keluvchi sabablar va shart-sharoitlarni bartaraf etish, korrupsiyaviy huquqbuzarliklarni sodir etganlik uchun javobgarlikning muqarrarligi tamoyilini taʼminlash.
5. Siyosat Vazirlikning ichki hujjati sifatida yuqorida koʻrsatilgan asosiy maqsadlarga erishish uchun adliya organlari va muassasalari faoliyatida korrupsiya bilan bogʻliq huquqbuzarliklarni profilaktika qilish va ularga barham berishga qaratilgan asosiy talablar
va tamoyillarni belgilab beruvchi asos hisoblanadi.
6. Mazkur Siyosatning talablari egallab turgan lavozimi
va bajaradigan vazifa va funksiyalaridan qatʼi nazar Vazirlik bilan mehnat munosabatlarida boʻlgan barcha xodimlarga, shu jumladan, hududiy adliya organlari va muassasalari xodimlariga tadbiq etiladi.
7. Adliya organlari va muassasalariga ishga qabul qilinayotgan
har qanday shaxs ushbu Siyosat bilan imzo qoʻygan holda tanishishga va uning qoidalariga rioya qilishga majbur.
8. Ushbu Siyosat maqsadlarida quyidagi asosiy tushunchalar va atamalar qoʻllaniladi:
aloqador shaxslar – xodim bilan tijorat tashkilotlarining ustav kapitalida ishtirok etadigan shaxslar, aksiyalari Respublika fond birjasida ommaviy muomalada boʻlgan aksiyadorlik jamiyatlarining besh foizidan kam boʻlgan miqdordagi aksiyaga ekanligi holatlari bundan mustasno;
ish jarayonidagi mehmondoʻstlik belgilari – adliya organlari
va muassasalari xodimlari manfaatlarida faoliyat davomida hamkorlik oʻrnatish va (yoki) qoʻllab-quvvatlashga aloqador xarajatlar, shu jumladan, ishbilarmonlik bilan bogʻliq kechki ovqat, transport va yashash xarajatlarini qoplash bilan bogʻliq xarajatlar va h.k.;
korrupsiyaga qarshi kurashish talablari buzilganligi toʻgʻrisida vijdonan xabar berish – adliya organlari va muassasalari xodimi tomonidan korrupsiyaviy huquqbuzarlik sodir etilganligi (sodir etishga suiqasd qilinganligi) toʻgʻrisida rusxat etilgan aloqa kanallari orqali asosliligiga ishonch hosil qilgan holda yoʻllagan murojaat;
kontragent (shartnomaviy sherik) – adliya organlari
va muassasalari bilan shartnomaviy munosabatlarga (mehnat munosabatlari bundan mustasno) kirishgan har qanday yuridik yoki jismoniy shaxs;
korrupsiya – shaxsning oʻz mansab yoki xizmat mavqeidan shaxsiy manfaatlarini yoxud oʻzga shaxslarning manfaatlarini koʻzlab moddiy
yoki nomoddiy naf olish maqsadida qonunga xilof ravishda foydalanishi, xuddi shuningdek bunday nafni qonunga xilof ravishda taqdim etish;
korrupsiyaviy harakatlar – xodim tomonidan pora beruvchining manfaatlarini koʻzlab harakat yoki harakatsizligi uchun bevosita yoki bilvosita, shaxsan yoki uchinchi shaxslar orqali porani yaʼni pul, qimmatbaho qogʻozlar, boshqa mol-mulkni, mulkiy tusdagi xizmatlarni, boshqa mulkiy huquqlarni olish, talab qilish, taklif qilish, vaʼda qilish va berish, shuningdek, pora berish va (yoki) olishda vositachilik qilish, rasmiyatchiliklarni soddalashtirish uchun toʻlovlarni olish, xodim tomonidan pora olish yoki huquqqa xilof boshqa maqsadlarda oʻz xizmat mavqeidan noqonuniy foydalanish;
korrupsiyaga oid huquqbuzarlik – korrupsiya belgilariga ega boʻlgan, sodir etilganligi uchun qonun hujjatlarida javobgarlik nazarda tutilgan qilmish;
korrupsiyaga qarshi kurashish tizimi – qoʻllaniladigan amaldagi qonunchilik va ichki hujjatlarni korrupsiyaviy jihatdan buzilishini bartaraf etish, adliya organlari va muassasalari xodimlari tomonidan yuqori darajada kasbiy va axloqiy faoliyat olib borishlarini taʼminlash boʻyicha chora-tadbirlar majmui;
korrupsiyaviy xavf-xatar – adliya organlari va muassasalari xodimlari yoki uchinchi shaxslar tomonidan adliya organlari va muassasalari nomidan va (yoki) ularning manfaatlarini koʻzlab korrupsiyaviy
xatti-harakatlarni sodir etish ehtimoli va xavfi;
manfaatlar toʻqnashuvi – adliya organlari va muassasalari xodimining shaxsiy (bevosita yoki bilvosita) manfaatdorligi uning xizmat majburiyatlarini lozim darajada bajarishiga taʼsir koʻrsatayotgan
yoxud taʼsir koʻrsatishi mumkin boʻlgan hamda xodimning shaxsiy manfaatdorligi bilan adliya organlari va muassasalari manfaatlari oʻrtasida qarama-qarshilik yuzaga kelayotgan yoki yuzaga kelishi mumkin boʻlgan vaziyat;
rasmiyatchilikni soddalashtirish uchun toʻlovlar – belgilangan tartib-taomillar bajarilishini taʼminlash yoki tezlashtirish, tegishli qonunchilik, normalar va qoidalarda nazarda tutilmagan harakatlar sodir etish uchun gʻayriqonuniy ravishda beriladigan pul mablagʻlari, mol-mulk, mulkiy huquqlar, xizmatlar va boshqa moddiy yoki nomoddiy naf;
xodimning shaxsiy manfaatdorligi – adliya organlari va muassasalari xodimi tomonidan oʻz xizmat vazifalarini bajarish chogʻida uning yaqin qarindoshi yoki xodimga aloqador boʻlgan shaxslar tomonidan xodimning mansab yoki xizmat majburiyatlarini lozim darajada bajarishiga taʼsir qilishi mumkin boʻlgan pul mablagʻlari, moddiy yoki nomoddiy qimmatliklar, boshqa mol-mulk, boylik va imtiyozlar koʻrinishida shaxsiy naf olish imkoniyati (shaxsiy, ijtimoiy, moliyaviy, siyosiy va boshqa tijorat yoki notijorat manfaatlari);
xodim – adliya organlari va muassasalari bilan mehnat munosabatlariga kirishgan shaxs;
yaqin qarindoshlar – ota-ona, tugʻishgan va oʻgay aka-ukalar va opa-singillar, er (xotin), farzandlar, shu jumladan farzandlikka olinganlar, bobolar, buvilar, nevaralar, shuningdek erning (xotinning) ota-onasi;
2-bob. Korrupsiyaga qarshi kurashishning asosiy tamoyillari
9. Adliya organlari va muassasalari korrupsiyaga qarshi kurashish tizimini quyidagi tamoyillarga asoslanib amalga oshiradi:
qonuniylik – adliya organlari va muassasalari korrupsiyaga qarshi kurashish boʻyicha chora-tadbirlar Oʻzbekiston Respublikasi qonunchiligi talablari, davlat organlarida korrupsiyaga qarshi kurashish boʻyicha jahonda tan olingan amaliyotni hisobga olgan holda hamda Vazirlik tizimining belgilangan ichki hujjatlariga muvofiq amalga oshiriladi;
korrupsiyaga toqatsizlik – adliya organlari va muassasalari
oʻz faoliyatining barcha sohalarida korrupsiyaning har qanday shakllari va koʻrinishlariga murosasiz munosabatda boʻladi. Adliya organlari va muassasalarining xodimlariga korrupsiyaviy xavf-xatar kelib chiqishi mumkin boʻlgan faoliyatda bevosita yoki bilvosita ishtirok etish taqiqlanadi;
ochiqlik va shaffoflik – Vazirlik tizimida korrupsiyaga qarshi kurashish sohasida qabul qilingan va amalga oshirilayotgan chora-tadbirlar haqida adliya organlari xodimlari va kontragentlarini,
keng jamoatchilikni xabardor qilish;
korrupsiyaga qarshi kurashish boʻyicha amalga oshirilayotgan chora-tadbirlarning preventivligi, tizimliligi va oʻzaro bogʻliqligi – adliya organlari va muassasalari korrupsiyaviy xatti-harakatlar sodir etilishiga va korrupsiyaviy xavf-xatarlarga koʻmaklashuvchi sabab va
shart-sharoitlarni bartaraf etishga qaratilgan preventiv chora-tadbirlarni amalga oshirishga ustuvor ahamiyat beradi. Korrupsiyaga qarshi kurashish boʻyicha amalga oshirilayotgan chora-tadbirlar va tartib-taomillar aniqlangan xavf-xatarlar darajasiga muvofiq keladi hamda adliya organlarining barcha funksiyalari va yoʻnalishlariga integratsiya qilingan korrupsiyaga qarshi kurashish tizimiga birlashtirilgan;
korrupsiya bilan bogʻliq huquqbuzarliklar uchun javobgarlikning muqarrarligi – korrupsiya bilan bogʻliq huquqbuzarliklarni sodir etgan Vazirlik tizimi xodimlari oʻzining maqomi va egallab turgan lavozimidan qatʼiy nazar Vazirlikning ichki hujjatlari va amaldagi qonunchilikka muvofiq javobgarlikka tortiladilar;
texnika taraqqiyotining yutuqlaridan foydalanish – adliya organlari va muassasalarida korrupsiyaga qarshi kurashish tizimini yaratishda ilm-fan taraqqiyotining soʻnggi yutuqlaridan, shu jumladan, integratsiyalashtirilgan axborot tizimlaridan foydalanishga intiladi;
toʻgʻridan-toʻgʻri rahbariyatga murojaat qilish – Vazirlik tizimining har bir xodimi korrupsiyaviy huquqbuzarliklar sodir etilganligini toʻgʻrisida ishonchli va asosli maʼlumotlar mavjud boʻlganda belgilangan choralarni koʻrish uchun toʻsqinliksiz idora rahbari va adliya vaziriga murojaat qilishi mumkin;
fuqarolik jamiyati vakillari bilan oʻzaro hamkorlik – adliya organlari oʻzlariga yuklatilgan funksiyalarni bajarishda adliya organlari va muassasalari faoliyatini halollik, xolislik va mustaqillik asosida mustaqil nazorat qilish maqsadida fuqarolik jamiyati vakillarini jalb etadilar;
korrupsiyaga qarshi kurashish tizimini doimiy ravishda takomillashtirish – korrupsiyaga qarshi kurashish tizimini monitoring
va nazorat qilish hamda korrupsiyaviy xavf-xatarlarni amalga oshirish natijalariga koʻra adliya organlari va muassasalari Vazirlik tizimida korrupsiyaga qarshi kurashish tizimining samaradorligini toʻxtovsiz ravishda oshirish choralarini koʻradilar.
3-bob. Korrupsiyaga qarshi kurashish tizimning elementlari
10. Korrupsiyaga “mutlaqo toqatsizlik” tamoyiliga tayangan holda adliya organlari va muassasalarining barcha xodimlariga korrupsiya bilan bogʻliq har qanday xatti-harakatlarda ishtirok etishi, yaʼni pora beruvchining manfaatlarini koʻzlab harakat qilishi yoki harakatsizligi uchun bevosita yoki bilvosita, shaxsan yoki uchinchi shaxslar orqali pora,
yaʼni pullar, qimmatbaho qogʻozlar, boshqa mol-mulk, mulkiy tusdagi xizmatlarni berishni talab qilish, tovlamachilik qilish, vaʼda berish
va pora berish, pora berish va (yoki) olishda vositachilik qilish, rasmiyatchiliklarni soddalashtirish uchun toʻlovlarni olish, shaxs tomonidan pora olish yoki gʻayriqonuniy boshqa maqsadlarda oʻz xizmat mavqeidan noqonuniy foydalanishi qatʼiyan taqiqlanadi.
11. Quyidagilar adliya organlari va muassasalarida korrupsiyaga qarshi kurashish tizimining asosiy elementlari hisoblanadi:
a) korrupsiyaga qarshi kurashish boʻyicha asosiy ichki hujjatlar mavjudligi, yaʼni adliya organlari va muassasalarida korrupsiyaga qarshi kurashish tizimining asosini:
mazkur Siyosat;
Oʻzbekiston Respublikasi adliya organlari va muassasalari xodimlarining odob-axloq qoidalari;
Oʻzbekiston Respublikasi Adliya vazirligi tizimida manfaatlar toʻqnashuvini boshqarish toʻgʻrisidagi nizomda aks ettirilgan tamoyillar
va talablarni tashkil etadi;
b) “Yuqoridan quyiga munosabat” – Yuqori darajada rahbarlik namunasi:
adliya organlari va muassasalarining rahbarlari, shuningdek, adliya organlari va muassasalarining tarkibiy boʻlinmalarining rahbarlari oʻziga boʻysunuvchilar, fuqarolar va yuridik shaxslar bilan munosabatlarda halol, adolatli va mustaqil xulq-atvor namunasi boʻlishlari kerak;
adliya vaziri, adliya vazirining oʻrinbosarlari, adliya organlari
va muassasalari rahbarlari korrupsiyaga qarshi kurashish samarali tizimni yaratish va amalga oshirishda quyidagilar orqali yetakchilikni namoyish etadilar:
adliya organlari va muassasalari faoliyatining xavf-xatarga ega funksiyalari (yoʻnalishlari)ga korrupsiyaga qarshi kurashish samarali
chora-tadbirlar va tartiblarni joriy etish, shu jumladan, korrupsiyaga qarshi kurashish dasturi/yoʻl xaritasini ishlab chiqish va uning ijrosini nazorat qilish orqali koʻmaklashish;
oʻz mansab majburiyatlarini bajarish doirasida, adliya organlari
va muassasalari xodimlarida korrupsiyaning barcha shakllari
va koʻrinishlariga murosasiz munosabatni shakllantirgan holda korrupsiyaga qarshi kurashish boʻyicha qonunchilik normalari va qabul qilingan ichki hujjatlarga rioya qilish va axloqiy xulq-atvor yuzasidan shaxsan namuna sifatida namoyon boʻlish;
v) korrupsiyaviy xavf-xatarni aniqlash va baholash:
adliya organlari va muassasalari funksiyalarining xususiyati, tashkiliy tuzilmasi, jamiyat va boshqa shaxslar bilan oʻzaro faoliyat olib borishiga hamda boshqa ichki va tashqi omillarga bogʻliq holda oʻz faoliyatiga xos boʻlgan korrupsiyaviy xavf-xatarlarni ayniqlaydi va baholaydi;
korrupsiyaviy xavf-xatarni aniqlash va baholash doirasida adliya organlari va muassasalari faoliyatining barcha sohalari korrupsiyaviy xavf-xatariga koʻproq uchraydigan funksiyalarni aniqlash maqsadida tahlil qilinadi, ularda mavjud boʻlgan korrupsiyaga qarshi kurashishni nazorat qilishning barcha shakllari va tartib-taomillari aniqlangan
xavf-xatarlarni kamaytirish uchun yetarliligi jihatidan tahlil qilinadi. Xavf-xatarlarni aniqlash va baholash jarayonida Adliya vazirligi tizimida korrupsiyaga qarshi kurashish boʻlimining faol qoʻllab-quvvatlashi
va nazorati ostida adliya organlarining tegishli rahbarlari, korrupsiyaga qarshi kurashishni muvofiqlashtiruvchi shaxslar ishtirok etadi;
adliya organlari va muassasalarining korrupsiyaviy harakatlarga “mutlaqo toqatsizlik”ni hisobga olgan holda adliya organlari
va muassasalari korrupsiyaviy xavf-xatarlarning yuzaga kelish ehtimoli
va taʼsir qilish darajasidan qatʼi nazar ularni boshqarish zaruratini tan oladi;
Korrupsiyaviy xavf-xatarlarni baholash yiliga kamida bir marta amalga oshiriladi. Korrupsiyaviy xavf-xatarlarni baholash natijalari adliya vaziri va adliya organlarining rahbarlari tomonidan koʻrib chiqiladi shuningdek, aniqlangan xavf-xatarlarni kamaytiruvchi korrupsiyaga qarshi kurashish chora-tadbirlar va tartib-taomillar adliya organlarining korrupsiyaga qarshi kurashish dasturlarida aks ettiriladi.
g) korrupsiyaga qarshi kurashish uchun masʼul shaxslar va boʻlinmalar:
Vazirlik tizimida korrupsiyaga qarshi kurashish boʻyicha samarali tizimni yoʻlga qoʻyish maqsadida Adliya vazirligining markaziy apparatida korrupsiyaga qarshi kurashishni shakllantirish va nazorat qilish jarayoni uchun masʼul boʻlgan alohida tarkibiy tuzilma – Adliya vazirligi tizimida korrupsiyaga qarshi kurashish boʻlimi tashkil etilgan;
Adliya vazirligi tizimidagi korrupsiyaga qarshi kurashish boʻlimi vazirlikda korrupsiyaga qarshi kurashish boʻyicha vazifalarni amalga oshirishda yetarli darajada mustaqillikka va muhim resurslarga ega boʻlib, bevosita adliya vaziriga boʻysunadi va oʻz faoliyatini vazir tomonidan tasdiqlangan Adliya vazirligi tizimida korrupsiyaga qarshi kurashish boʻlimi toʻgʻrisidagi nizomga muvofiq amalga oshiradi;
Korrupsiyaga qarshi kurashish boʻyicha chora-tadbirlarni samarali va oʻz vaqtida amalga oshirilishini muvofiqlashtirish va nazorat qilish uchun hududiy adliya boshqarmalari va tizimdagi muassasalarda ruxsat etilgan lavozimlarga korrupsiyaga qarshi kurashishni muvofiqlashtirish funksiyasi yuklatilishi mumkin. Korrupsiyaga qarshi kurashishni muvofiqlashtirish funksiyalari hududiy adliya boshqarmalari va boʻysunuvdagi muassasalarda yuqori darajada korrupsiyaviy xavf-xatarga ega boʻlmagan, shuningdek, yetarli darajada mustaqil boʻlgan xodimiga yuklatiladi;
hududiy adliya boshqarmalari va boʻysunuvdagi muassasalarning korrupsiyaga qarshi kurashishni muvofiqlashtiruvchilari korrupsiyani bartaraf etish choralarini koʻradi, shu bilan birga, oʻziga yuklatilgan vazifalar doirasida Adliya vazirligi tizimida korrupsiyaga qarshi kurashish boʻlimi bilan hamkorlik qiladi;
Korrupsiyaga qarshi kurashish boʻyicha faoliyatni amalga oshirishda adliya organlari va muassasalarining Kadrlar boshqarmasi (boʻlimlari) Oʻzbekiston Respublikasi Adliya vazirligi tizimida manfaatlar toʻqnashuvini boshqarish toʻgʻrisidagi nizom va Oʻzbekiston Respublikasi qonun hujjatlari normalariga muvofiq belgilangan tartibda va hajmda xodimlar va aloqador shaxslarning yaqin qarindoshlari toʻgʻrisidagi maʼlumotlarni oʻz vaqtida va tizimli yigʻish, tahlil qilish va yangilab borish uchun javobgar boʻladi;
Bundan tashqari, adliya organlarining odob-axloq komissiyalari xodimlar oʻrtasida manfaatlar toʻqnashuvi toʻgʻrisidagi Kadrlar boshqarmasi (boʻlimlari)dan kelib tushgan maʼlumotlarni koʻrib chiqadi va (manfaatlar toʻqnashuvi tartibga solinmagan taqdirda) uni hal qilish boʻyicha qaror qabul qiladi yoki aniqlangan manfaatlar toʻqnashuvini tartibga solish boʻyicha koʻrilgan choralarning yetarliligi yoxud yetarli emasligi toʻgʻrisida qaror qabul qiladi, shuningdek, adliya organlari va muassasalari tomonidan belgilangan odob-axloq qoidalariga rioya qilinishi masalalarini koʻrib chiqadi. Manfaatlar toʻqnashuvini boshqarish doirasida Kadrlar boshqarmasi (boʻlimlari) va Odob-axloq komissiyalari (yoki shunga oʻxshash komissiyalar) Oʻzbekiston Respublikasi Adliya vazirligi tizimida manfaatlar toʻqnashuvini boshqarish toʻgʻrisidagi nizom asosida ish yuritadi;
d) aniqlangan korrupsiyaviy xavf-xatarni minimallashtiruvchi korrupsiyaga qarshi kurashish choralar:
adliya organlari va muassasalari oʻz faoliyati va funksiyalaridagi korrupsiyaviy xavf-xatarli yoʻnalishlarda umumiy nazorat muhitini va korrupsiyaga qarshi kurashish nazorat hamda tartib-taomillarni oʻz ichiga oluvchi korrupsiyaga qarshi kurashishning kompleks tizimini joriy etadilar.
Adliya organlari korrupsiyaga qarshi kurashishni nazorat qilish
va tartib-taomillarning samaradorligi, jumladan, ularning aniqlangan xavf-xatar darajasiga mutanosibligi, adliya organlari xodimlari uchun qatʼiyligi va aniqligi, fuqarolik jamiyati uchun shaffofligini taʼminlashga intiladilar;
Amalga oshiriladigan tadbirlar, shuningdek, korrupsiyaga qarshi kurashish boʻyicha nazorat choralari va tartib-taomillar adliya organlarining korrupsiyaga qarshi kurashish boʻyicha dasturi/rejasi/yoʻl xaritasida aks ettiriladi hamda tegishli ichki hujjatlarda belgilanadi;
ye) axborotlashtirish, kommunikatsiya va maslahat berish:
Korrupsiyaviy xavf-xatarlarni kamaytirish va adliya organlarining korrupsiyaga qarshi kurashish tamoyillari va talablari haqida jamiyatning xabardorligini oshirish maqsadida, mazkur Siyosat va adliya organlarining korrupsiyaga qarshi kurashish boʻyicha amalga oshirilayotgan chora-tadbirlari toʻgʻrisidagi asosiy maʼlumotlar ularning Internet tarmogʻidagi rasmiy veb saytlariga joylashtiriladi.
Bundan tashqari, adliya organlari va muassasalari korrupsiyaga qarshi kurashish amaldagi qonun hujjatlari normalari va korrupsiyaga qarshi kurashish joriy etilgan tamoyillar va talablar haqida adliya organlari va muassasalari xodimlari va boshqa manfaatdor shaxslarni xabardor qilish va tushuntirish boʻyicha quyidagilar orqali barcha oqilona xatti-harakatlarni amalga oshiradi:
adliya organlari va muassasalari xodimlarini yiliga kamida bir marta korrupsiyaga qarshi kurashish asoslari boʻyicha doimiy va tizimli oʻqitish, shu jumladan, ishga yangi qabul qilinayotgan xodimlarni ushbu Siyosat va korrupsiyaga qarshi kurashish boʻyicha boshqa ichki hujjjatlar bilan majburiy tartibda tanishtirish bilan birgalikda ularni korrupsiyaga qarshi kurashish boʻyicha majburiy kurslarda oʻqitish. Korrupsiyaviy xavf-xatari yuqori boʻlgan lavozimlar uchun adliya organlarida korrupsiyaga qarshi kurashish boʻyicha qoʻshimcha taʼlim dasturlari belgilanadi. Oʻtkazilgan oʻqish/treninglar haqidagi maʼlumotlar Kadrlar boshqarmasi (boʻlimlari)da qonunchilikda belgilangan tartibda saqlanadi;
adliya organlari va muassasalari xodimlari va fuqarolarning korrupsiyaga murosasiz munosabatini shakllantirish boʻyicha va korrupsiyaga qarshi kurashish amalga oshirilgan chora-tadbirlar toʻgʻrisida xabardorligini oshirishga qaratilgan tematik audio- va videoroliklar hamda boshqa axborot maʼlumotlaridan foydalangan holda korrupsiyaga qarshi kurashish tadbirlar oʻtkazish;
adliya organlari va muassasalari xodimlari tomonidan korrupsiyaga oid huquqbuzarliklar sodir etilganligi gumonlar yoki faktlar, korrupsiyaviy xavf-xatarlar va boshqalar (korrupsiya faktlari haqida xabar berilishi mumkin boʻlgan usullari toʻgʻrisidagi batafsil maʼlumot mazkur Siyosatning 4-bobida nazarda tutilgan) haqida xabar berilishi mumkin boʻlgan aloqa kanallari bilan taʼminlash;
mazkur Siyosat qoidalarini qoʻllash yoki Adliya vazirligi tizimida korrupsiyaga qarshi kurashish boʻlimi/korrupsiyaga qarshi kurashishni muvofiqlashtiruvchi tomonidan korrupsiyaga qarshi kurashish chora-tadbirlar va tartib-taomillarni amalga oshirish bilan bogʻliq savollar kelib chiqqanda adliya organlari va muassasalari xodimlariga maslahatlar berish;
adliya organlari va muassasalari xodimlarining mehnat shartnomalariga korrupsiyaga qarshi kurashish qoidalarni kiritish;
tasdiqlangan rejaga muvofiq korrupsiyaga qarshi kurashish boʻyicha masʼul shaxs tomonidan korrupsiyaga qarshi kurashish xulq-atvor yuzasidan tashviqotlar oʻtkazish;
kontragentlarni korrupsiyaga qarshi kurashish qabul qilingan talablar va tamoyillar haqida, shu jumladan, ular bilan tuziladigan shartnomalarga korrupsiyaga qarshi kurashish boʻyicha maxsus shartlarni kiritish toʻgʻrisida xabardor qilish va h.k.;
g) monitoring, nazorat va hisobot:
Adliya vazirligi tizimida korrupsiyaga qarshi kurashish boʻlimi Vazirlik tizimida korrupsiyaga qarshi kurashish amalga oshirilgan chora-tadbirlarning yetarliligi, mutanosibligi va samaradorligini baholaydi hamda doimiy monitoringini olib boradi. Oʻtkazilgan monitoring natijalari boʻyicha adliya organlarida korrupsiyaga qarshi kurashish tizimini takomillashtirish yuzasidan tegishli choralar koʻriladi.
Adliya organlarida monitoring va nazorat qilishning quyidagi tartib-taomillari amalga oshiriladi:
adliya organlari va muassasalari faoliyati va funksiyalaridagi oʻzgarishlar, ularning tashkiliy-funksional tuzilmasidagi oʻzgarishlar hamda boshqa ichki va tashqi omillarning adliya organlarida korrupsiyaga qarshi kurashish tizimiga taʼsirini, mazkur tizimga oʻzgartirish kiritish zaruriyatini tahlil qilish, shu jumladan, uni amaldagi qonunchilik talablariga muvofiqligini taʼminlash;
tasdiqlangan rejaga muvofiq samarasiz nazorat va tartib-taomillarni aniqlash uchun ularni toʻgʻrilash va korrupsiyaga qarshi kurashish tizimining ishonchliligi va samaradorligini taʼminlash maqsadida tanlov asosida vazirlik tizimidagi funksiyalar va ichki jarayonlarni monitoring qilish;
ichki va (yoki) tashqi tekshiruvlarni oʻtkazish jarayonida adliya organlari va muassasalari xodimlari tomonidan korrupsiyaga qarshi kurashish boʻyicha talablarga rioya qilinishini nazorat qilish;
Adliya vazirligi tizimida korrupsiyaga qarshi kurashish boʻlimi/korrupsiyaga qarshi kurashishni muvofiqlashtiruvchi va boshqa tarkibiy tuzilmalarga yuklatilgan korrupsiyaga qarshi chora-tadbirlarning oʻz vaqtida va tegishli tartibda amalga oshirilishi ustidan nazorat olib borish va h.k.
Korrupsiyaga qarshi kurashish tizimini nazorat qilish va monitoringi boʻyicha chora-tadbirlar natijalari adliya vaziri, Vazirlik hayʼati, tegishli hududiy boshqarmalar va vazirlik tizimidagi muassasalar rahbarlarining choraklik hisobotlarida oʻz aksini topadi.
z) huquqbuzarliklarga nisbatan munosabat bildirish va aybdor shaxslarni javobgarlikka tortish:
mazkur Siyosatga amal qilish va Vazirlik tizimida korrupsiyaga qarshi kurashish chora-tadbirlarga rioya qilish har bir xodim uchun oʻz xizmat majburiyatlarini bajarilishi doirasida majburiydir. Xodimlar belgilangan talab va tartib-taomillarning buzganligi uchun shaxsan javobgar hisoblanadilar. Bundan tashqari, bevosita rahbarlar
oʻz boʻysunuvidagi xodimlar tomonidan korrupsiyaga oid huquqbuzarliklarni sodir etilganligi uchun shaxsan javobgar hisoblanadilar;
korrupsiyaga qarshi kurashishga oid belgilangan talablar
va tamoyillarni buzgan adliya organlari va muassasalari xodimlari Oʻzbekiston Respublikasi qonunchiligida belgilangan tartibda va asoslarda intizomiy, maʼmuriy yoki jinoiy javobgarlikka tortililadilar;
xodimlar ularni korrupsiya bilan bogʻliq huquqbuzarlikni sodir etishga undovchi shaxslarning har qanday murojaatlari toʻgʻrisida, shuningdek, boshqa xodimlar tomonidan sodir etilgan korrupsiyaga oid huquqbuzarliklar haqida oʻziga maʼlum boʻlgan har qanday faktlar haqida oʻz rahbarlariga va Adliya vazirligi tizimida korrupsiyaga qarshi kurashish boʻlimiga xabar berishlari shart;
korrupsiyaga mutlaqo toqatsizlik tamoyilini hisobga olgan holda, Vazirlik tizimida adliya organlari va muassasalari xodimlarining korrupsiyaga oid huquqbuzarlik sodir etishlari bilan bogʻliq har qanday asosli shubha boʻyicha xizmat tekshiruvlari Oʻzbekiston Respublikasi konunchiligi talablariga muvofiq va ichki hujjatlarda belgilangan tartibda oʻtkaziladi. Korrupsiyaga qarshi kurashish toʻgʻrisidagi qonun hujjatlari normalarini va (yoki) mazkur siyosat va adliya organlarining boshqa ichki hujjatlarida belgilangan korrupsiyaga qarshi talab va tartib-taomillarni buzgan adliya organlari va muassasalari xodimlari, ularning lavozimi, xizmat muddati va boshqa omillardan qatʼi nazar Oʻzbekiston Respublikasi qonunchiligida hamda adliya organlarining ichki hujjatlarida nazarda tutilgan doirada va asoslarda javobgarlikka tortiladilar;
korrupsiyaga oid huquqbuzarlik aniqlangan taqdirda adliya organlari ularning sodir etilish sabablari va shart-sharoitlarini tahlil qiladilar va doimiy asosda korrupsiyaga qarshi kurashish tizimini takomillashtiradilar;
Adliya organlari va muassasalari korrupsiyaga oid huquqbuzarliklarni aniqlash va tekshirish uchun boshqa huquqni muhofaza qiluvchi organlar
va davlat organlari bilan hamkorlik qiladilar.
4-bob. Korrupsiyaga qarshi kurashishning asosiy yoʻnalishlari
§ 1. Manfaatlar toʻqnashuvini boshqarish
12. Adliya organlari va muassasalari xodimlari oʻz xizmat majburiyatlarini bajarish va (yoki) adliya organlari manfaatlarini ifodalash doirasida vijdonlilik va halollik tamoyillariga amal qilishi, shaxsiy manfaatlarini hisobga olgan holda oʻzlarining xizmat mavqeidan va (yoki) adliya organlarining mol-mulkidan foydalanmaslik va manfaatlar toʻqnashuviga olib keladigan vaziyatlardan saqlanishlari lozim.
Adliya organlari va muassasalari xodimlarining oʻzlarining xizmat majburiyatlarini lozim darajada va xolis bajarishlariga, jumladan, xolis qaror qabul qilishga hamda adliya organlari va muassasalarining huquqlari, qonuniy manfaatlari, mol-mulki va (yoki) nufuziga taʼsir qiladigan
yoki taʼsir qilishi mumkin boʻlgan vaziyatda manfaatlar toʻqnashuvi yuzaga keladi.
13. Vazirlik tizimining xodimlari ishga qabul qilinishida, boshqa lavozimga oʻtkazilishida manfaatlar toʻqnashuviga olib keladigan yoki olib kelishi mumkin boʻlgan shaxsiy manfaatdorligi haqidagi maʼlumotlarni har yili va tegishli vaziyatlar/holatlar yuzaga kelishiga qarab oshkor qilishga majburdirlar. Adliya organlari va muassasalari xodimlari tomonidan manfaatlar toʻqnashuvi toʻgʻrisidagi maʼlumotlarni oshkor qilish va uni hal qilish jarayoni Oʻzbekiston Respublikasi Adliya vazirligi tizimida manfaatlar toʻqnashuvini boshqarish toʻgʻrisidagi nizom bilan tartibga solinadi.
§ 2. Sovgʻalar va ish jarayonida mehmondoʻstlik belgilari
14. Adliya organlari va muassasalari xodimlariga oʻz xizmat majburiyatlarini bajarish bilan bogʻliq holda jismoniy va yuridik shaxslardan biron-bir sovgʻa yoki ish jarayonida mehmondoʻstlikning belgilari, qarz, kafolatlar, kafilliklar, mukofotlar shaklida ragʻbatlantirish vositalarini, naqd pul mablagʻlari yoki ularning ekvivalenti, qimmatli qogʻozlar koʻrinishida moddiy yordam qabul qilish taqiqlanadi.
15. Adliya organlari va muassasalari xodimlari tomonidan rasmiy delegatsiyalar tarkibida, rasmiy tadbirlarda, jumladan, xorijda olingan har qanday sovgʻalar summasidan qatʼi nazar adliya organlarining mulkiga oʻtkaziladi.
16. Adliya organlari va muassasalari xodimlariga ularning shaxsi bilan bogʻliq bayramlar (tugʻilgan kun, bolaning tugʻilishi, Vatan himoyachilari kuni, Xalqaro xotin-qizlar kuni)da berilgan, xizmat majburiyatlarini bajarishi bilan bogʻliq boʻlmagan sovgʻalar xodimning shaxsi bilan bogʻliq sovgʻalar deb tan olinadi.
17. Bunday sovgʻalarni berishda quyidagi talablarga rioya qilish lozim:
sovgʻalar adliya organlari (muassasalari)ning kamida uch nafar xodimlari ishtirokida berilishi;
sovgʻa berish jaryoni tabrik nutqi bilan birga boʻlishi, unda sovgʻa berishga sabab boʻlgan voqea oʻzining aniq ifodasini topgan boʻlishi;
sovgʻaning umumiy qiymati (barcha soliqlar va yigʻimlarni hisobga olgan holda) 5 (besh) bazaviy hisoblash miqdoridan oshmasligi;
adliya organining bitta xodimi boshqa xodimga sovgʻa uchun sarflaydigan xarajat summasi, har bir holatda 1 (bitta) bazaviy hisoblash miqdordan oshmasligi kerak.
18. Shubhalar paydo boʻlmasligi uchun boshqa davlat organlari
va tashkilotlari xodimlari, sheriklar va kontragentlar, ushbu Siyosatning 15 va 16-bandlarida koʻrsatilmagan boshqa jismoniy va yuridik shaxslardan har qanday bayram (tugʻilgan kun, farzand tugʻilishi, Vatan himoyachilari kuni, Xalqaro xatin-qizlar kuni va h.k.ni inobatga olgan holda, biroq
bu bilan cheklanmasdan) bilan bogʻliq holda olinadigan, ushbu Siyosatning
14-bandida sanab oʻtilgan sovgʻalar va boshqa moddiy boyliklarni olish taqiqlanadi.
19. Adliya vazirligi nomidan xalqaro konferensiyalarda, simpoziumlarda va boshqa ishbilarmonlik (xizmatga oid) yigʻilishlarda sovgʻalar berish adliya vaziri yoki uning oʻrinbosarlarining buyrugʻi bilan amalga oshiriladi.
20. Sovgʻani qabul qilishning qonuniyligi toʻgʻrisida shubha tugʻilgan har qanday hollarda adliya organi xodimi Adliya vazirligi tizimida korrupsiyaga qarshi kurash boʻlimiga maslahat soʻrab murojaat qilishi lozim.
§ 3. Xodimlarni tanlash, lavozimdan lavozimga oʻtkazish, moddiy ragʻbatlantirish
21. Adliya organlari va muassasalari xodimlarini tanlash, ularni attestatsiyadan oʻtkazish va faoliyatini baholash, shu jumladan mukofot pullarini toʻlash, ustama haqlar va boshqa turdagi mukofotlarni belgilash jarayoni barcha xodimlar uchun shaffof, teng va xolis boʻlib, ushbu Siyosatning asosiy tamoyillari va talablariga muvofiq keladi.
22. Adliya organlari va muassasalarida ularning rahbarlari, shuningdek, boshqarma va boʻlim boshliqlarini mukofotlashga asos boʻlib xizmat qiladigan, ular faoliyatining asosiy koʻrsatkichlarini baholash tartibi va mezonlari ishlab chiqilgan boʻlishi lozim. Ushbu koʻrsatkichlar xolis, oshkora hamda adliya organlari va muassasalari xodimlari tomonidan koʻrib chiqilishi mumkin.
§ 4. Tekshirishlarni oʻtkazish hamda davlat organlari va tashkilotlari faoliyatini oʻrganish
23. Turli xil tekshirishlarni oʻtkazish hamda davlat organlari
va tashkilotlarining (keyingi oʻrinlarda – “Tekshirish obyektlari”) faoliyatini oʻrganishda adliya organlari va muassasalari xodimlari:
manfaatlar toʻqnashuviga yoʻl qoʻymasligi;
obyektni tekshirish bir xodim tomonidan amalga oshirilmasligi;
sodir etilishi mumkin boʻlgan huquqbuzarliklarni soxtalashtirish uchun tekshirish obyekti vakillarining savodsizligidan foydalanib qonun hujjatlari normalarini notoʻgʻri talqin qilmasligi, tekshirilayotgan obyekt xodimlarini aniqlangan faktlarni huquqni muhofaza qiluvchi organlarga taqdim etish bilan qoʻrqitmasligi;
tekshirilayotgan obyektning xodimlariga tahdid qilmasligi;
tekshirish predmetiga kirmaydigan masalalar bilan qiziqmasliklari va hujjatlarni soʻramasliklari.
adliya organlari va muassasalari xodimlari tekshirish davomida aniqlangan har bir huquqbuzarlik holatlariga qonuniy va professional baho berishlari;
agar tekshirish obyekti vakillari adliya organlari va muassasalari xodimlariga aniqlangan qonunbuzarliklarni yashirish uchun pora va (yoki) biron-bir moddiy qimmatlik yoki xizmatlarni taklif qilsa, tekshirish guruhi rahbarini darhol xabardor qilishlari;
tekshirish obyekti vakillariga adliya organlari va muassasalari xodimlarining axloqiy xulq-avtor tamoyillariga muvofiq xolis munosabatda boʻlishlari shart.
24. Xizmat majburiyatiga davlat organlari va tashkilotlarini tekshirish kiradigan adliya organlarining tarkibiy tuzilmalarida oʻtkazilgan tekshirish natijalari boʻyicha adliya organlari va muassasalari tomonidan qabul qilingan qarorlar yuzasidan nizolashish uchun apellyatsiya instansiyalari tashkil etiladi.
5-§. Kontragentlar va uchinchi shaxslar bilan oʻzaro munosabatlar
25. Adliya organlari va muassasalari ushbu Siyosatning tamoyillari
va talablariga zid boʻlgan har qanday toʻlovlar va (yoki) shu kabi korrupsiyaviy xavf-xatarlarni keltirib chiqaruvchi xatti-harakatlarni amalga oshirish uchun mahsulot yetkazib beruvchilarni, pudratchilarni
va boshqa uchinchi tomonlarni jalb qilmaydilar.
26. Adliya organlari va muassasalari kontragentlar bilan munosabatlarda oʻz faoliyatini amalga oshirishida qonuniylik
va shaffoflik tamoyillariga amal qiladilar. Adliya organlari
va muassasalari tanlashning xolis mezonlaridan foydalanishga asoslangan, mahsulot yetkazib beruvchilar, pudratchilar va boshqa kontragentlarni tanlab olishning haqqoniy, ochiq va shaffof jarayonini hamda Oʻzbekiston Respublikasining amaldagi qonunchiligi va sotib olinadigan mahsulotning Vazirlik tizimining ichki hujjatlari bilan tartibga solinadigan bahosini aniqlashning shaffof tartibini taʼminlaydilar.
27. Adliya organlari va muassasalari kontragent bilan oʻzaro hamkorligida:
ehtimoli yuqori boʻlgan kontragentning ishonchliligini, shu jumladan oʻtmishda korrupsiyaviy huquqbuzarliklarni sodir etganligi, adliya organlari va muassasalarila davlat xaridlari toʻgʻrisidagi nizomga muvofiq va Oʻzbekiston Respublikasi qonunchiligi normalari doirasida Vazirlik tizimi xodimlari bilan manfaatlar toʻqnashuvi mavjud emasligini tekshiradilar;
ehtimoli yuqori boʻlgan kontragentni (tanlov, tender gʻolibini
va toʻgʻridan-toʻgʻri shartnomalar boʻyicha xarid kontragentini) oʻzining korrupsiyaga qarshi tamoyillari va talablari haqida ular bilan tuziladigan shartnomalar matniga korrupsiyaga qarshi maxsus shartlarni qoʻshgan holda xabardor qiladilar.
§ 6. Xayriya va homiylik faoliyati
28. Adliya organlari va muassasalari qonunda nazarda tutilgan hollarda xayriya va homiylikni qabul qilishlari mumkin. Bunday yordamni olgan paytda adliya organlari manfaatlar toʻqnashuviga yoʻl qoʻymaslik, mablagʻlarni qonunda va (yoki) shartnomada belgilangan maqsadlar uchun samarali sarflanishini taʼminlash, shuningdek Internet tarmogʻidagi oʻzining rasmiy veb-saytlarida imkon qadar barcha choralarni koʻrishlari mumkin.
§ 7. “Sirli mijoz” tadbiri
29. Adliya organlari va muassasalari tomonidan koʻrsatilayotgan davlat xizmatlarining sifati va tezligini, shuningdek haqqoniy va ochiq tanlov natijalariga koʻra tanlab olingan mustaqil kompaniyalar tomonidan korrupsiyaviy huquqbuzarliklar sodir etilishiga moyilligini aniqlash uchun xizmatlarning haqiqiy oluvchilari sifatida alohida nazorat tadbirlari oʻtkaziladi. Davlat xizmatlarini koʻrsatish jarayonida mustaqil kompaniya bunday xizmatlarning sifati, muddatlari, shartlarini, shuningdek, vazirlik tizimi xodimlarining belgilangan axloq qoidalariga, shu jumladan xodimning pora olishga moyilligini belgilab boradi.
30. Adliya organlari va muassasalari oʻtkazilgan “sirli mijoz” tadbirlari toʻgʻrisidagi hisobotlarni koʻrib chiqadilar va korrupsiya xavfi aniqlangan taqdirda xizmat tekshiruvi tayinlash haqidagi tashabbus bilan chiqadilar.
§ 8. Adliya organlari va muassasalari faoliyatini videotasvirga olish va translyatsiya qilish
31. Adliya organlari va muassasalari xodimlarining faoliyatini nazorat qilish uchun adliya organlari xonalarida video va audio yozuv kameralari joylashtiriladi, ularning yozuvlari adliya organlari va muassasalarining masʼul xodimlari tomonidan doimiy ravishda kuzatib boriladi.
32. Adliya organlari va muassasalarining rasmiy veb-saytlariga korrupsiya xavfi yuqori boʻlgan ayrim jarayonlarning onlayn translyatsiyalari joylashtiriladi (xususan, xodimlar bilan suhbat oʻtkazish va ularni sinovdan oʻtkazish, komissiya yigʻilishlari va boshqalar).
§ 9. Ichki hujjatlarni korrupsiyaga qarshi ekspertizasi
33. Ichki xujjatlarni huquqiy ekspertizadan oʻtkazishda hujjatlarda korrupsiyaviy huquqbuzarliklar sodir etilishiga imkon yaratadigan korrupsiyaviy omillar kelib chiqishini oldini olish, aniqlash va istisno qilish maqsadida ham ekspertiza oʻtkaziladi.
§ 10. Adliya organlari xodimlariga maslahat berish
34. Adliya organlari va muassasalari xodimlarida korrupsiyaga qarshi amaldagi qonun hujjatlari talablari, ushbu Siyosat qoidalari yoki adliya organlarida korrupsiyaga qarshi boshqa chora-tadbirlar va tartib-taomillar bilan bogʻliq boʻlgan har qanday savollar boʻlsa, ular oʻzlarining tarkibiy boʻlinmasi/adliya organi va (yoki) Adliya vazirligi tizimida korrupsiyaga qarshi kurashish boʻlimiga hamda “1008” ishonch telefoniga murojaat qilishlari mumkin.
5-bob. Korrupsiyaviy huquqbuzarliklar toʻgʻrisida xabar berish
35. Adliya organlari va muassasalari xodimlari va boshqa shaxslar, agar ular Vazirlik tizimi xodimlari xatti-harakatlarining qonuniyligi va (yoki) odob-axloqqa muvofiqligi toʻgʻrisida shubha tugʻilsa, korrupsiya
va boshqa huquqbuzarlik holatlari sodir etilishiga gumon yoki sodir etilganligi faktlari boʻlsa, ular bu haqda vazirlikning foydalanish mumkin boʻlgan aloqa kanallari orqali xabar berishlari mumkin.
36. Adliya organlari va muassasalari oʻz vakolatlari va mavjud imkoniyatlari doirasida huquqbuzarlik toʻgʻrisida ishonchli maʼlumot bergan shaxsning maxfiyligini taʼminlaydilar (qonunchilikda nazarda tutilgan hollar bundan mustasno).
37. Adliya organlari va muassasalari oʻz xodimlarining manfaatlarini himoya qiladilar va qasos olishga qaratilgan harakatlarga, shu jumladan ishdan boʻshatish, lavozimni pasaytirish, kamsitish, bosim oʻtkazish, vazirlik tizimining boshqa xodimlarining shubhali harakatlari yoki ular tomonidan ushbu Siyosatning korrupsiyaga qarshi talablarini buzish ehtimoli haqida xabar bergan shaxslarni taʼqib qilinishiga yoʻl qoʻymasligini kafolatlaydilar.
38. Korrupsiyaga oid huquqbuzarliklar toʻgʻrisidagi xabarlarni quyidagi aloqa kanallari orqali berish mumkin:
“1008” telefon raqami va adliya organlari tomonidan oʻrnatilgan boshqa telefon raqamlar;
adliya organlarining @antikorbot va boshqa Telegram kanallari;
adliya organlarining rasmiy veb-saytlarida joylashtirilgan shakllar;
adliya organlarining elektron pochta manzillari;
toʻgʻridan-toʻgʻri huquqni muhofaza qilish organlariga.
39. Vazirlik tizimining aloqa kanallariga kelib tushgan barcha xabarlar Oʻzbekiston Respublikasi qonun hujjatlari va adliya organlarining ichki hujjatlariga muvofiq Vazirlik tizimining masʼul boʻlinmasi yoki xodimi tomonidan xolis tarzda va oʻz vaqtida koʻrib chiqiladi.
40. Anonim ravishda (faqat adliya organlarining Telegram kanallari orqali) yuborilgan xabarlar ham koʻrib chiqish uchun qabul qilinadi.
Oʻz nomini oshkor qilinmasligini istagan ariza beruvchi bunday holatda quyidagilarni tan oladi:
adliya organlari va muassasalari xabarga javob berish uchun murojaat etuvchi shaxs bilan bogʻlana olmaydi;
adliya organlari va muassasalari zarur qoʻshimcha maʼlumotlarni olishning imkoniyati yoʻqligi sababli xabarni toʻliq va har tomonlama tekshirishni amalga oshira olmaydi.
41. Adliya organlari va muassasalari tomonidan kelib tushgan xabarga javob berish uchun murojaat etuvchi shaxs bilan quyidagi holatlarda bogʻlanilmaydi:
toʻliq va keng qamrovli tekshirish oʻtkazish uchun zarur boʻlgan qoʻshimcha maʼlumotlarning yoʻqligi;
adliya organlari va muassasalari xodimining qasddan yolgʻon maʼlumotni taqdim etishi ushbu Siyosatni buzilishi va axloqsiz
xulq-atvorning namunasi sifatida qaralsa, bunday shaxs esa Oʻzbekiston Respublikasi qonun hujjatlariga va vazirlikning ichki hujjatlariga muvofiq javobgarlikka tortilishi mumkin.
42. Vazirlik tizimida korrupsiya faktlari toʻgʻrisida vijdonan xabar bergan adliya organlarining xodimlari, agar bu maʼlumotlar tasdiqlangan boʻlsa, ichki hujjatlarga muvofiq ragʻbatlantirilishi mumkin.
43. Barcha aloqa kanallarining ishlashi va olingan xabarlarni qayta ishlash/koʻrib chiqish tartibi toʻgʻrisidagi batafsil maʼlumot
Adliya vazirligining korrupsiyaviy tusdagi maʼlumot haqida xabar berish uchun aloqa kanallari toʻgʻrisidagi nizomda va adliya organlarining boshqa shunga oʻxshash ichki hujjatlarida aks etgan.
6-bob. Qayta koʻrib chiqish va oʻzgartirishlar kiritish tartibi
44. Ushbu Siyosat quyidagi hollarda qayta koʻrib chiqilishi
va tuzatilishi kerak:
korrupsiyaga qarshi kurashish amaldagi siyosat va tartib-taomillarni qayta koʻrib chiqish zaruratini keltirib chiqaradigan holda korrupsiyaga qarshi kurashish sohasida Oʻzbekiston Respublikasining qonunchiligi oʻzgarganda;
korrupsiyaga qarshi kurashish samarasiz nazorat va tartib-taomillar aniqlanganda va adliya organlari va muassasalari faoliyatida korrupsiyani oldini olish va unga qarshi kurashishga qaratilgan chora-tadbirlarni takomillashtirishga zarurat tugʻilganda;
vazirlik tizimining tashkiliy tuzilmasi va (yoki) adliya organlari
va muassasalari tomonidan oʻz vazifalarini bajarishi xususiyatlari
va boshqalar oʻzgarganda.