Namangan viloyat adliya boshqarmasi huzuridagi Jamoatchilik kengashi ma'lumotlari

Namangan viloyat adliya boshqarmasi huzuridagi Jamoatchilik Kengashining 2024-yil 21 sentbyardagi №1-sonli yigʻilish bayoniga

1-ilova

Namangan viloyat adliya boshqarmasi xuzuridagi Jamoatchili Kengashi

TARKIBI

№	F.I.Sh.	Jamoatchilik kengashida lavozimi	Ish joyi, lavozimi	Izoh
1.	Ubaydullayev Muxammadali Vahobjonovich	Rais	Demokratik jarayonlarni tahlil qilish markazi Namangan viloyati hududiy boʻlinmasi rahbari	93 676 97 79
2.	Joʻrayev Azamat Baqijonovich	Rais oʻrinbosari	Namangan viloyat adliya boshqarmasi boshliq oʻrinbosari	91 355 44 22
3.	Axmedxodjayeva Zulfiya Sobitovna	Kotibiyat mudiri	Namangan viloyat adliya boshqarmasi Nodavlat notijorat tashkilotlari boʻlimi boshligʻi	91 367 59 00
4.	Muxiddinov Anvarjon Nuriddinovich	Aʼzo	mehnat faxriysi	91 181 83 81
5.	Umarova Nasibaxon Akbarovna	Aʼzo	mehnat faxriysi	91 367 29 21
6.	Axunova Oylarxon Muxammadjanovna	Aʼzo	mehnat faxriysi	93 494 87 50
7.	Karimov Bahodir Abdugʻaniyevich	Aʼzo	mehnat faxriysi	90 551 00 98
8.	Karimov Ikromjon Isoqjonovich	Aʼzo	OʻzNNTMA Namangan viloyat boʻlimi koordinatori	99 324 09 66
9.	Otaboyev Dilshod Karimjonovich	Aʼzo	“Kelajak nuri” NNT rahbari	93 264 37 38
10.	Abduxalimova Mavluda	Aʼzo	“Men va oilam” NNT rahbari	90-555-97-13
11.	Ibragimov Nargiza Zokirjonovna	Aʼzo	Namangan viloyat xotin-qizlar tadbirkorlik markazi	90 279 33 99
12.	Sodiqov Ikromjon Mamadaliyevich	Aʼzo	Namangan viloyat teleradiokompaniyasi rahbari oʻrinbosari	99 975 71 24
13.	Xujaxanov Rashitxon Kasixanovich	Aʼzo	Oʻzbekiston Notarial palatasi Namangan viloyati hududiy boshqarmasi	90 597 90 86
14.	Joʻrayev Isroil Ikramovich	Aʼzo	Oʻzbekiston “Adolat” SDP viloyat kengashi raisi	91 177 90 05
15.	Otabayev Ilxom Abdusamatovich	Aʼzo	Oʻzbekiston XDP viloyat kengashi raisi	90 597 50 04
16.	Muminov Solijon Djalilovich	Aʼzo	OʻzLiDeP viloyat kengashi raisi	90 218 49 94
17.	Azizova Dilnoza Zaxitxonovna	Aʼzo	Oʻzbekiston “Milliy tiklanish” DP viloyat kengashi raisi	91 362 33 55
18.	Nazarov Abdugʻaffor Abdujabbarovich	Aʼzo	Oʻzbekiston ekologik partiyasi viloyat kengashi raisi	91 356 80 07
19.	Akbarov Odil Zokirjonovich	Aʼzo	Oʻzbekiston savdo-sanoat palatasi	91 479 35 35
20.	Nuriddinova Raʼno Abduganiyevna	Aʼzo	“Istiqbolli avlod” markazi viloyat rahbari	91 345 65 28
21.	Voxidova Shaxnoza Zoxidovna	Aʼzo	“Qalb mehri” ayollar va ularni oilalarini qoʻllab-quvvatlash markazi ijrochi direktori	94 176 00 65
22.	Dehqanov Nosirjon Abbasovich	Aʼzo	Jurnalistlar uyushmasi Namangan viloyat boʻlimi rahbari	93 404 30 00
23.	Muminova Moxirajon Abdillajonovna	Aʼzo	Namangan viloyat "IJTIMOIY HIMOYA" jamiyati	94 369 38 79
24.	Djamalov Xusnitdin Kamalovich	Aʼzo	Oʻzbekiston "VETERAN" jangchi-faxriy va nogironlari birlashmasi Namangan viloyat boʻlimi raisi	90 218 53 51
25.	Xalilov Tojiddin Abduvaliyevich	Aʼzo	Oʻzbekiston nogironlar assotsiatsiyasi Namangan viloyat hududiy boʻlimi	97 754 10 07

Namangan viloyat adliya boshqarmasi huzuridagi Jamoatchilik Kengashining 2024-yil 21 sentbyardagi №1-sonli yigʻilish bayoniga

2-ilova

NAMANGAN VILOYAT ADLIYA BOSHQARMASI HUZURIDAGI “JAMOATCHILIK KENGASHI”

NIZOMI

NAMANGAN – 2024 y

Namangan viloyat adliya boshqarmasi huzuridagi jamoatchilik kengashi

NIZOM

1-bob. Umumiy qoidalar

1. Mazkur nizom Namangan viloyat adliya boshqarmasi huzuridagi jamoatchilik kengashining (keyingi oʻrinlarda — jamoatchilik kengashi) asosiy vazifalari, funksiyalari, vakolatlarini va faoliyatini tashkil etish tartibini belgilaydi.

2. Jamoatchilik kengashi oʻz ishini jamoatchilik asosida olib boradigan, doimiy faoliyat yurituvchi maslahat-kengash organi hisoblanadi.

3. Jamoatchilik kengashi boshqarmanining markaziy apparati huzurida tashkil etiladi va uning faoliyati boshqarmanining barcha hududiy boʻlinmalari hamda tasarrufidagi tashkilotlariga tatbiq etiladi.

4. Jamoatchilik kengashi nodavlat notijorat tashkilotlar (keyingi oʻrinlarda - NNTlar) vakillarining yigʻilishi qarori bilan tashkil etiladi.

5. Jamoatchilik kengashining qarorlari tavsiyaviy xususiyatga ega.

6. Jamoatchilik kengashi oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga hamda boshqa qonun hujjatlariga amal qiladi.

7. Jamoatchilik kengashi toʻgʻrisidagi nizom va unga kiritiladigan oʻzgartishlar hamda qoʻshimchalar NNTlar vakillarining yigʻilishi qarori bilan tasdiqlanadi.

2-bob. Jamoatchilik kengashining asosiy vazifalari, funksiyalari, huquqlari va majburiyatlari

8. Quyidagilar jamoatchilik kengashining asosiy vazifalari hisoblanadi:

qabul qilinayotgan normativ-huquqiy hujjatlarda, qarorlarda, shuningdek, davlat, tarmoq va hududiy rivojlantirish dasturlarida jamoatchilik manfaatlari va jamoatchilik fikri hisobga olinishi, fuqarolarning, yuridik shaxslarning huquqlari va qonuniy manfaatlarini, jamiyat manfaatlarini himoya qilish sohasida qonun hujjatlari talablari ijrosini taʼminlash, boshqarma zimmasiga yuklangan hamda ijtimoiy
va jamoatchilik manfaatlariga daxl qiluvchi vazifalar va funksiyalarni bajarish, davlat xizmatlarini koʻrsatish, ijtimoiy sheriklik doirasida amalga oshiriladigan bitimlar, shartnomalar, loyihalar va dasturlarni roʻyobga chiqarish boʻyicha boshqarma va uning mansabdor shaxslarining faoliyati ustidan jamoatchilik nazoratini amalga oshirish;

birgalikda muloqot qilish, boshqarmaning nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari bilan samarali hamkorligini taʼminlash uchun boshqarmani fuqarolar bilan bogʻlab turadigan “koʻprik” rolini bajarish;

davlat boshqaruvi organlariga nodavlat notijorat tashkilotlari
va fuqarolik jamiyatining boshqa institutlaridan kelib tushgan sotsial
va ijtimoiy ahamiyatga molik loyihalarni umumlashtirish va baholash;

fuqarolarning huquqlari, erkinliklari va qonuniy manfaatlariga daxl qiluvchi eng muhim masalalar yuzasidan boshqarmaning faoliyati haqidagi jamoatchilik fikrini tizimli monitoring qilish va har tomonlama tahlil qilish, sotsiologik soʻrovlar oʻtkazish, jumladan ularni axborot-kommunikatsiya texnologiyalaridan foydalangan holda oʻtkazish;

boshqarma faoliyatida korrupsiyaga qarshi kurashish sohasidagi davlat dasturlari va boshqa dasturlarni ishlab chiqish hamda amalga oshirishda ishtirok etish, korrupsiyaga qarshi kurashish boʻyicha olib borilgan ishlar ustidan monitoring va tahlil oʻtkazish, shuningdek, ularning natijalari boʻyicha takliflar tayyorlash;

boshqarma faoliyatining ochiqligini taʼminlash boʻyicha amalga oshirilayotgan tadbirlarni monitoring qilish, uning faoliyati toʻgʻrisida batafsil axborot olish imkoniyatlarini tahlil qilish, ularni yanada kengaytirish boʻyicha takliflar ishlab chiqish;

boshqarma va tuman (shahar) adliya boʻlimlari faoliyatini isloh qilishda fuqarolar ishtirok etishi uchun yaratilgan shart-sharoitlarni oʻrganish va ularni yaxshilash boʻyicha takliflar ishlab chiqish;

boshqarma va tuman (shahar) adliya boʻlimlari faoliyati boʻyicha fuqarolar oʻrtasida oʻtkaziladigan tushuntirish ishlari va maʼnaviy-maʼrifiy tadbirlarda ishtirok etish, ularning samaradorligini oshirish yuzasidan takliflar ishlab chiqish;

boshqarma va tuman (shahar) adliya boʻlimlari xodimlari va ular oilalarining uy-joy, ijtimoiy-maishiy, xizmat shart-sharoitlarini, ularga malakali tibbiy yordam koʻrsatish sharoitlarini, shuningdek, ishdan boʻshatilgan yoki zaxiraga olingan xodimlarni ijtimoiy va kasbiy moslashtirish boʻyicha muammolarni kompleks tahlil qilish hamda tahlil yakunlari boʻyicha mazkur sharoitlarni yaxshilash yuzasidan takliflar kiritish.

9. Jamoatchilik kengashi oʻz zimmasiga yuklatilgan vazifalarga muvofiq quyidagi funksiyalarni bajaradi:

boshqarma va tuman (shahar) adliya boʻlimlarining faoliyatiga doir masalalar yuzasidan fuqarolar, nodavlat notijorat tashkilotlari
va fuqarolik jamiyati boshqa institutlarining tashabbuslari hamda murojaatlarini koʻrib chiqishda ishtirok etadi, shuningdek, ularni koʻrib chiqish natijalari boʻyicha boshqarmaga tegishli takliflar kiritadi;

boshqarma va tuman (shahar) adliya boʻlimlarining fuqarolar, nodavlat notijorat tashkilotlari va fuqarolik jamiyatining boshqa institutlari bilan oʻzaro hamkorligini tahlil qiladi, shuningdek, hamkorlikni takomillashtirish yuzasidan takliflar ishlab chiqadi;

boshqarma va tuman (shahar) adliya boʻlimlari faoliyatiga taalluqli uning normativ-huquqiy hujjatlari va qarorlarini takomillashtirish, ulardagi mavjud kamchiliklarni bartaraf etish boʻyicha takliflar ishlab chiqadi, shuningdek, kiritilgan takliflarni mazkur boshqarma xodimlari oʻrtasida muhokama qilishga bagʻishlangan tadbirlarni tashkil etishda qatnashadi;

davlat dasturlari loyihalarini, tadbirlar rejalarini va boshqarma faoliyatiga taalluqli, shu jumladan korrupsiyaga qarshi kurashish toʻgʻrisidagi boshqa hujjatlarni ishlab chiqish yuzasidan takliflar tayyorlaydi, qabul qilingan dasturlarni amalga oshirishda vakolatlari doirasida ishtirok etadi, bajarilgan ishlarning samaradorligini tahlil qiladi, shuningdek, yoʻl qoʻyilgan xato va kamchiliklarni bartaraf etish yuzasidan takliflar tayyorlaydi;

davlat boshqaruvi organlariga nodavlat notijorat tashkilotlari
va fuqarolik jamiyatining boshqa institutlaridan kelib tushgan sotsial
va ijtimoiy ahamiyatga molik loyihalarni koʻrib chiqadi;

boshqarma rahbarlari va xodimlarining fuqarolar bilan uchrashuvlarini, shuningdek, jismoniy va yuridik shaxslar murojaatlarini koʻrib chiqish bilan bogʻliq ishlarni tashkil etishda, shu jumladan joylarga borib tashkil etishda qatnashadi, ularning amalga oshirilishi ustidan monitoring oʻtkazadi;

boshqarma va tuman (shahar) adliya boʻlimlari xodimlari va ular oilalarining uy-joy, ijtimoiy-maishiy, xizmat shart-sharoitlarini, ularga malakali tibbiy yordam koʻrsatish sharoitlarini yaxshilashda, shuningdek, ishdan boʻshatilgan yoki zaxiraga olingan xodimlarni ijtimoiy va kasbiy moslashtirish muammolarini hal etishda koʻmaklashadi;

xodimlar va ularning oila aʼzolarini ijtimoiy va huquqiy himoya qilish masalalari boʻyicha boshqarma xodimlari oʻrtasida keng tushuntirish ishlarini tashkil etadi;

boshqarmada, uning hududiy boʻlinmalarida va tasarrufidagi tashkilotlarida sogʻlom ishchanlik muhitini rivojlantirish, qonuniylikni, yuksak huquqiy madaniyat va axloqiylikni taʼminlash, xodimlarda Vatanga sodiqlik ruhini va qonunlarga boʻlgan hurmatni kuchaytirish, ularni ijtimoiy, siyosiy, ruhiy va maʼnaviy-maʼrifiy kamol toptirish, shuningdek, mazkur sohadagi ilmiy-maʼrifiy va oʻquv adabiyotlarini takomillashtirish boʻyicha takliflar ishlab chiqadi;

mamlakatda va xorijda keng jamoatchilikni boshqarma faoliyatini isloh qilish boʻyicha amalga oshirilayotgan tizimli chora-tadbirlar haqida muntazam ravishda xabardor qilishni taʼminlaydi hamda mavjud muammolarni hal qilish va kamchiliklarni bartaraf etish yuzasidan takliflar ishlab chiqadi;

boshqarma va tuman (shahar) adliya boʻlimlari faoliyatiga bagʻishlangan ilmiy-nazariy va ilmiy-amaliy konferensiyalar, seminarlar, davra suhbatlarini tashkil etishda ishtirok etadi;

boshqarma faoliyatini ommaviy axborot vositalarida yoritish boʻyicha bajarilayotgan ishlarning natijalarini tahlil qiladi, ularning samaradorligini oshirish va mavjud kamchiliklarni bartaraf etish yuzasidan takliflar ishlab chiqadi;

oʻziga yuklatilgan vazifalarni bajarishda nodavlat notijorat tashkilotlari, ommaviy axborot vositalari, fuqarolik jamiyatining boshqa institutlari hamda fuqarolar bilan hamkorlik qiladi.

10. Jamoatchilik kengashi zimmasiga yuklatilgan vazifalar
va funksiyalarni bajarish uchun:

boshqarma tomonidan tashkil etiladigan boʻlajak ochiq hayʼat majlislari va boshqa ommaviy tadbirlar toʻgʻrisidagi axborotni oldindan olish hamda mazkur tadbirlarda ishtirok etish;

boshqarmaning, jumladan uning hududiy boʻlinmalari va tasarrufidagi tashkilotlarining binolari (xonalari) va boshqa obyektlarini boshqarma tomonidan belgilangan tartibda borib koʻrish;

boshqarma, uning hududiy boʻlinmalari va tasarrufidagi tashkilotlari rahbarlariga jamoatchilik kengashi vakolatiga kiradigan masalalar yuzasidan takliflar kiritish;

boshqarma faoliyati samaradorligini oshirish boʻyicha takliflar
va tavsiyalarni ishlab chiqish hamda amalga oshirish uchun zarur boʻlgan boshqarmaning axborotlari, statistika va boshqa materiallarini belgilangan tartibda olish;

boshqarma va tuman (shahar) adliya boʻlimlarining qonun ijodkorligi faoliyatida, boshqarma tomonidan ishlab chiqilgan normativ-huquqiy hujjatlar loyihalarining jamoatchilik va ekspertlar muhokamasini taʼminlashda ishtirok etish;

jismoniy va yuridik shaxslar murojaatlariga boshqarma tomonidan berilgan javoblarning sifatini tanlab olgan holda tahlil qilish;

boshqarma xodimlarining roziligi bilan ularning uy-joy, ijtimoiy-maishiy va xizmat shart-sharoitlari bilan tanishish;

jamoatchilik kengashi majlislarida muhokama qilinadigan masalalarni yoritish boʻyicha ommaviy axborot vositalari bilan hamkorlik qilish;

yuklatilgan vazifalarni bajarish uchun konferensiyalar, forumlar, seminarlar, davra suhbatlari va boshqa tadbirlarni tashkil etish huquqiga ega.

Jamoatchilik kengashi qonun hujjatlariga muvofiq boshqa huquqlarga ham ega boʻlishi mumkin.

11. Jamoatchilik kengashi oʻz faoliyatini amalga oshirishda:

jamoatchilik nazorati toʻgʻrisidagi qonun hujjatlari talablariga rioya qilishi;

boshqarma faoliyati bilan bogʻliq qonun hujjatlarida belgilangan cheklovlarga amal qilishi;

boshqarma va uning mansabdor shaxslarining oʻz vakolatlari doirasida amalga oshiradigan faoliyatiga aralashmasligi;

boshqarma va uning mansabdor shaxslari faoliyat koʻrsatishi uchun toʻsqinlik qilmasligi;

fuqarolarning or-nomusi va qadr-qimmatini tahqirlashga, ularning shaxsiy hayotiga aralashishga yoʻl qoʻymasligi;

jamoatchilik nazoratini amalga oshirish davomida olingan axborotning, agar bunday axborotni tarqatish qonun bilan cheklangan boʻlsa, maxfiyligiga rioya qilishi shart.

Jamoatchilik kengashining zimmasida qonun hujjatlariga muvofiq boshqa majburiyatlar ham boʻlishi mumkin.

3-bob. Jamoatchilik kengashining tarkibini shakllantirish va ishini tashkil etish tartibi

12. Jamoatchilik kengashining tarkibiga uning raisi, rais oʻrinbosari, kotibi va aʼzolari kiradi.

13. Jamoatchilik kengashi aʼzoligiga, qoida tariqasida, boshqarmada namunali xizmat koʻrsatgan mehnat faxriylari, jamoatchilik faoliyati sohalarida katta amaliy tajribaga ega obroʻ-eʼtiborli fuqarolar, shuningdek, nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari vakillari qabul qilinadi.

Jamoatchilik kengashi aʼzolarining soni cheklanmagan.

14. Jamoatchilik kengashining tarkibi boshqarma boshligʻining buyrugʻi bilan har 3 yilda tasdiqlanadi.

15. Quyidagi holatlarda jamoatchilik kengashining raisi, rais oʻrinbosari, kotibi va aʼzolari uning tarkibidan chiqarilishi mumkin:

ular tomonidan jamoatchilik kengashi tarkibidan chiqish toʻgʻrisida ariza berilganda;

jamoatchilik kengashining majlislarida muntazam ravishda ishtirok etmaganda, mazkur Nizomning 11-bandida nazarda tutilgan majburiyatlarni bajarmaganda;

ularga nisbatan chiqarilgan sudning ayblov hukmi qonuniy kuchga kirganda;

vafot etganda, shuningdek, sudning qonuniy kuchga kirgan hal qiluv qarori asosida ular muomalaga layoqatsiz, bedarak yoʻqolgan yoki vafot etgan deb topilganda.

16. Jamoatchilik kengashining tarkibi toʻgʻrisidagi maʼlumotlar
va unga kiritilgan oʻzgartishlar ular tasdiqlangan paytdan boshlab 5 kun ichida boshqarmaning rasmiy veb-saytida eʼlon qilinadi.

17. Jamoatchilik kengashining raisi:

jamoatchilik kengashining faoliyatiga umumiy rahbarlik qiladi;

jamoatchilik kengashining majlislarini chaqiradi va kun tartibini belgilaydi;

jamoatchilik kengashining majlislarida raislik qiladi;

jamoatchilik kengashining ish rejasini, majlisi bayonnomasini
va boshqa hujjatlarini tasdiqlaydi;

jamoatchilik kengashi qarorlarining ijrosini nazorat qiladi;

jamoatchilik kengashi aʼzolarining zimmasiga yuklatilgan vazifalarni bajarilishini muvofiqlashtiradi;

boshqarmaning rasmiy veb-saytida va boshqa resurslarda joylashtiriladigan jamoatchilik kengashining faoliyati toʻgʻrisidagi maʼlumotlar tarkibi boʻyicha takliflar kiritadi va uni boshqarma rahbari bilan kelishadi;

jamoatchilik kengashi qarorlarini bajarish masalalari yuzasidan boshqarma rahbari bilan hamkorlik qiladi;

jamoatchilik kengashining samarali ishini taʼminlash boʻyicha boshqa vakolatlarni amalga oshiradi.

18. Jamoatchilik kengashining raisi boʻlmagan taqdirda, uning vakolatlari va majburiyatlarini rais oʻrinbosari bajaradi.

19. Jamoatchilik kengashi raisining oʻrinbosari:

rais yoʻqligida jamoatchilik kengashining majlislarida raislik qiladi;

jamoatchilik kengashi qarorlarining ijrosini nazorat qilish boʻyicha ishlarni tashkil etadi;

fuqarolarni va yuridik shaxslarning vakillarini qabul qiladi, shuningdek, jamoatchilik kengashi faoliyatiga taalluqli murojaatlarni koʻrib chiqish boʻyicha ishlarni tashkil etadi;

jamoatchilik kengashining samarali ishlarini taʼminlash boʻyicha boshqa vakolatlarni amalga oshiradi.

20. Jamoatchilik kengashining kotibi:

jamoatchilik kengashining faoliyatini uslubiy, tashkiliy-huquqiy
va tashkiliy-texnik jihatdan taʼminlash masalalarini hal qiladi;

jamoatchilik kengashining navbatdagi majlisiga barcha zarur materiallar oʻz vaqtida tayyorlanishini taʼminlaydi, boshqarma xodimlaridan zarur hujjatlar va maʼlumotlarni soʻrab oladi;

kun tartibiga muvofiq jamoatchilik kengashi majlislari oʻtkazilishini tashkil etadi;

jamoatchilik kengashi oʻtkaziladigan sana, joy va taklif etiladigan shaxslar roʻyxatini jamoatchilik kengashining raisi bilan kelishadi;

jamoatchilik kengashining aʼzolarini va taklif etilgan shaxslarni jamoatchilik kengashi majlisi oʻtkaziladigan joy, sana va vaqt haqida xabardor qiladi;

jamoatchilik kengashi qarorlarining ijro etilishi ustidan monitoring olib boradi va uning natijalarini jamoatchilik kengashi majlisida koʻrib chiqish boʻyicha takliflar kiritadi;

jamoatchilik kengashi majlisining bayonnomasini rasmiylashtiradi va tasdiqlangan bayonnomaning jamoatchilik kengashi aʼzolari hamda boshqa manfaatdor shaxslarga joʻnatilishini taʼminlaydi;

jamoatchilik kengashining samarali ishlashini taʼminlash boʻyicha boshqa vakolatlarni amalga oshiradi.

21. Jamoatchilik kengashining aʼzolari oʻz majlislarida koʻrib chiqiladigan masalalarni muhokama qilish va hal qilishda oʻz vakolatini boshqalarga oʻtkazish huquqiga ega emas.

Jamoatchilik kengashining majlisida ishtirok etish imkoni boʻlmagan holatlarda, uning aʼzosi majlis kun tartibidagi masalalar boʻyicha oʻz fikrini yozma shaklda yuborishi mumkin. Bunda uning fikri majlisda koʻrib chiqiladi va ovoz berishda hisobga olinadi.

Jamoatchilik kengashining aʼzolari:

oʻz zimmalariga yuklatilgan vazifalarni bajarish uchun boshqarma tomonidan tashkil etiladigan hayʼat majlislarida va boshqa ommaviy tadbirlarda ishtirok etadi;

jamoatchilik kengashi ish rejalarining loyihalarini tayyorlaydi, ularni jamoatchilik kengashida koʻrib chiqish uchun kiritadi va tasdiqlangan ish rejalari bajarilishini taʼminlaydi;

boshqarma faoliyatining samaradorligini oshirish boʻyicha takliflar va tavsiyalarni ishlab chiqishda hamda amalga oshirishda qatnashadi;

boshqarma xodimlari, ularning oila aʼzolari bilan uchrashuvlar oʻtkazadi va ularning huquqlari, erkinliklari hamda qonuniy manfaatlarini taʼminlash boʻyicha takliflarni jamoatchilik kengashiga kiritadi;

jamoatchilik kengashining kun tartibiga kiritilgan masalalar yuzasidan tahliliy materiallar tayyorlaydi;

jamoatchilik kengashining vakolatiga kiradigan masalalar bilan bogʻliq murojaatlarni koʻrib chiqadi va natijalari boʻyicha tegishli hujjatlarni tayyorlaydi;

jamoatchilik kengashining zimmasiga yuklangan vazifalar va funksiyalarga muvofiq boshqa vakolatlarni amalga oshiradi.

22. Jamoatchilik kengashi faoliyatining asosiy masalalari uning majlisida koʻrib chiqiladi. Jamoatchilik kengashining majlisi uning ish rejalari asosida har chorakda kamida bir marta chaqiriladi.

Jamoatchilik kengashining raisi jamoatchilik kengashi aʼzolarining uchdan bir qismining yozma murojaati asosida uning navbatdan tashqari majlisini chaqirishi mumkin.

23. Jamoatchilik kengashining majlislariga boshqa davlat organlari, nodavlat notijorat tashkilotlari va fuqarolik jamiyati institutlarining vakillari taklif etilishi mumkin.

24. Jamoatchilik kengashi majlisi kun tartibining loyihasi kotib tomonidan jamoatchilik kengashi aʼzolarining takliflari va jamoatchilik kengashi raisining topshirigʻi asosida shakllantiriladi.

25. Jamoatchilik kengashining majlisini uning raisi olib boradi. Rais ishtirok eta olmagan holatlarda, majlisni uning oʻrinbosari olib boradi.

Jamoatchilik kengashining majlisida boshqarma rahbari, uning oʻrinbosarlari va boshqa xodimlar ishtirok etishi mumkin.

26. Jamoatchilik kengashining majlisi, agar unda jamoatchilik kengashi aʼzolarining kamida uchdan ikki qismi (kvorum) ishtirok etgan taqdirda vakolatli hisoblanadi.

Majlisni oʻtkazish uchun kvorum shakllanmagan taqdirda, jamoatchilik kengashining yangi majlisi oʻtkaziladigan sana eʼlon qilinadi.

27. Jamoatchilik kengashining qarori majlisda ishtirok etayotgan jamoatchilik kengashi aʼzolarining oddiy koʻpchilik ovozi bilan qabul qilinadi.

28. Jamoatchilik kengashining har bir aʼzosi qabul qilinayotgan qarorlar boʻyicha oʻzining fikrini yozma shaklda ifodalashga haqli. Uning fikri jamoatchilik kengashi majlisining bayonnomasiga majburiy tartibda qoʻshib qoʻyiladi.

29. Jamoatchilik kengashining majlisida qabul qilingan qaror bayonnoma bilan rasmiylashtiriladi. Jamoatchilik kengashi majlisining bayonnomasi kotib tomonidan imzolanadi, majlisga raislik qiluvchi tomonidan tasdiqlanadi va uch kun muddatda boshqarmaga, jamoatchilik kengashi aʼzolariga va manfaatdor shaxslarga yuboriladi.

30. Jamoatchilik kengashining qarorini tezlik bilan qabul qilish zaruriyati tugʻilganda, uning raisi tashabbusi bilan qaror jamoatchilik kengashining aʼzolari bilan kelishilgan holda soʻrov yoʻli bilan qabul qilinishi mumkin.

Boshqarma jamoatchilik kengashining qabul qilgan qaroriga qoʻshilmagan hollarda, jamoatchilik kengashining qarorini olgan kundan boshlab oʻn kundan kechikmay unga asoslantirilgan eʼtirozini yozma shaklda yuboradi.

31. Jamoatchilik kengashining kotibi kengash aʼzolari koʻmagida jamoatchilik kengashi qarorlari ijrosining borishini oʻrganadi va koʻrib chiqadi, zarur boʻlgan hollarda, jamoatchilik kengashining raisiga tegishli takliflar kiritadi.

4-bob. Yakunlovchi qoidalar

32. Jamoatchilik kengashining faoliyatini moddiy-texnik jihatdan taʼminlash boshqarma tomonidan, shuningdek, qonun hujjatlarida taqiqlanmagan boshqa manbalar hisobidan amalga oshiriladi.

33. Jamoatchilik kengashining faoliyati uning nizomiga va Oʻzbekiston Respublikasining qonun hujjatlariga muvofiq ekanligi boshqarma boshligʻi tomonidan nazorat qilinadi.

34. Jamoatchilik kengashining va boshqarma boshligʻining jamoatchilik kengashi faoliyati bilan bogʻliq qarorlari ustidan belgilangan tartibda shikoyat qilinishi mumkin.