Янгиликлар

Ходим касаллик варақаси очилган вақтда ишдан бўшатилган.

Фуқаро Ф.Тожимирзаеванинг “Ўзсаноатқурилишбанк” Наманган минтақавий филиалидан ноқонуний ишдан бўшатилганидан норози бўлиб йўллаган мурожаати Наманган шаҳар адлия бўлими томонидан кўриб чиқилди.
Мурожаатни кўриб чиқиш давомида, Ф.Тожимирзаева 2018 йилдан буён “Ўзсаноатқурилишбанк” АТБ Наманган филиалида касса амалиётлари бўлими кассири лавозимида ишлаб келганлиги ва 2020 йил 8 июндан филиал бошлиғининг буйруғи билан Меҳнат кодексининг 100-моддаси 2-қисми 4-бандига асосан меҳнат шартномаси бекор қилиниб, ишдан бўшатилганлиги маълум бўлди.
Тўпланган ҳужжатларга кўра, фуқарони ишдан бўшатилишига ўз меҳнат вазифаларини бир марта қўпол равишда бузганлиги яъни, пул ёки товар қимматликлари билан ишлайдиган ходимнинг айбли ҳаракат содир этганлиги ҳамда ходим томонидан унга бўлган ишончнинг йўқотилишига олиб келувчи ножўя ва айбли ҳаракат содир этганлиги асос қилинган.
Бироқ Наманган шаҳар тиббиёт бирлашмасига қарашли 1-оилавий поликлиниканинг меҳнатга лаёқатсизлик варақасига кўра, Ф.Тожимирзаева 2020 йилнинг 8 июнидан 20 июнигача вақтинча меҳнатга қобилиятсизлик даврида бўлган.
Меҳнат кодексининг 100-моддаси 3-қисмида ходим вақтинча меҳнатга қобилиятсизлик даврида ва меҳнат тўғрисидаги қонунлар ва бошқа норматив ҳужжатларда назарда тутилган таътилларда бўлган даврида меҳнат шартномасини иш берувчининг ташаббуси билан бекор қилишга йўл қўйилмаслиги қатъий белгиланган.
Ф.Тожимирзаева билан тузилган меҳнат шартномасини бекор қилишда юқорида қайд қилинган меҳнат тўғрисидаги қонун ҳужжати талаблари бузилганлиги аниқланиб, у билан меҳнат шартномасини бекор қилиш ҳақидаги филиал бошлиғининг буйруғини бекор қилиш ва Ф.Тожимирзаевани ишга тиклаш тўғрисида “Ўзсаноатқурилишбанк” Наманган минтақавий филиали бошлиғи номига тақдимнома киритилди ҳамда фуқаро Ф.Тожимирзаева ишга тикланди.

Музаффар ҚИРГИЗОВ,
Наманган шаҳар адлия бўлими бош маслаҳатчиси